சென்று கிழக்கேசென்றால் இத்தலத்தை அடையலாம். இராமன் பூசித்துப் பேறுபெற்றனராதலின் இப்பெயர் எய்தியது.

இறைவன் பெயர் இராமநாதர். இறைவியின் பெயர் சரிவார்க் குழலி. தீர்த்தம் இராமதீர்த்தம்.

கல்வெட்டு:

இத்தலம் திருக்கண்ணபுரம் கல்வெட்டுக்களிற்சேர்த்தே அரசியலாரால் படியெடுக்கப்பெற்றுள்ளது. ஐந்து கல்வெட்டுக்கள் உள்ளன. இறைவன் இராமனதீச்சரமுடையார் என வழங்கப்பெறுவர். குலோத்துங்கசோழன் இக்கோயில் பூசைக்காகவும், அமுதுபடிக்காகவும் நிலம் அளித்தான். இந்நிலம் பின்னர் சிவபாதசேகரமங்கலம் என்று வழங்கப்பெற்றது. கோயிலைத் திருப்பணிசெய்தவனும் இவனே¹. பின்னர், திருமலைதேவமகாராயரின் (சகம் 1397) விக்ரமாதித்தன் என்னும் அரசகாரியம் பார்ப்பவன் கோயிலைப் பழுதுபார்த்திருக்கிறான். பூசைக்கும், அமுதுக்கும் நிலம் அளித்திருக்கின்றான்². கோனேரின்மை கண்டான் (யார் என்று அறியக்கூடவில்லை) காலத்தில் அருச்சகருக்குள் உரிமைப்போர் நிகழ்ந்திருக்கின்றது. அதனை நீக்கி, திருமன்னுசோழ பிரமராயனுக்கும் மானவரையனுக்கும் பூசை உரிமைகள் வழங்கப்பெற்றன³. தனியூரான தில்லையிலிருந்த மாகேசுவரர்களால் இக்கோயில் நிலம் பஞ்சத்தால் விளையாதுபோக, இராஜராஜபாண்டிமண்டலம், வீரசோழமண்டலம், நடுவில்நாடு, ஜெயங்கொண்டசோழமண்டலம் முதலியவற்றில் உள்ள கோயில்களிலிருந்து நெல்லும் பொன்னும் கொடுத்துதவும்படி உத்தரவிட்டிருக்கின்றனர். இது கோயில் நிர்வாகத்தின் தனிச்சிறப்பைக் குறிப்பதாகும்⁴.

81. திருக்கள்ளில்

தொண்டைநாட்டுத் தலம். சென்னை - வெங்கலூர் பேருந்து வழியில் உள்ளது. திருக்கள்ளம் எனப்பெயர் பெறும். பிருகு முனிவர் பூசித்துப் பேறு பெற்றார்.

சுவாமியின் பெயர் சிவாநந்தர். அம்மையின் பெயர் ஆனந்தவல்லி. தீர்த்தம் ஸ்ரீ நந்நி தீர்த்தம்.

_________

¹ 533 of 1922, ² 534. ³ 536, ⁴ 537 of 1922.