(உரை)
கைகோள்: களவு. தோழிக்கூற்று

துறை: நிலவு வெளிப்பட வருந்தல்.

     (இ-ள்) இதற்கு ‘நாற்றமும் தோற்றமும்’ (தொல். களவி. 23) என்னும் நூற்பாவின்கண் ‘புணர்ச்சி வேண்டினும்’ எனவரும் விதிகொள்க.

11-12: கொலை....................................தடிந்தும்

     (இ-ள்) கொலைநுதி எயிறு என்று-கொலைத்தொழிலினையும் கூர்மையுமுடைய மருப்பு என்று பெயர் கூறப்பட்டு; இருபிறை முளைத்த புகர்முகம்-வாயின்கண் இரண்டு பிறைகள் தோன்றப்பெற்ற புள்ளிகளையுடைய முகத்தினையுடைய யானை தன்னைவந்து எதிர்த்த நாளிலே; ஒருவிசை புழை கை தடித்தும்-ஒருமுறை அந்த யானையின் துளையையுடைய கையை வெட்டியும் என்க.

     (வி-ம்.) இது களிதரு புணர்ச்சி கூறுகின்றது. தலைவியை ஒரு யானை துரத்திவந்தபொழுது அதன் கையை வெட்டி வீழ்த்தித் தலைவன் அவளை உய்யக் கொண்டான் என்பது கருத்து. புகர்முகம்-யானை: அன்மொழித்தொகை. புழை-துளை. ஒருவிசை-ஒருமுறை. தடிதல்- வெட்டுதல்.

13-14: மதுவிதழ்,.....................................அளித்தும்

     (இ-ள்) மது இதழ்க் குவளை என்று அடுகண் மலர்ந்த நெடுஞ்சுனை புதைய-எம்பெருமாட்டி ஒருநாள் தேனையும் இதழ்களையுமுடைய குவளை மலர்கள் என்று பெயர் கூறப்பட்டுக் கொல்லுகின்ற கண்களை மலர்ந்த நெடிய சுனையிடத்தில் நீராடுங்கால் முழுகாநிற்ப; புகுந்து எடுத்து அளித்தும்-அச்சுனை நீரினூடு புகுந்து அவளை எடுத்துக் கரையேற்றி உய்யக் கொண்டும் என்க.