(உரை)
கைகோள் : கற்பு. தலைவன் கூற்று

துறை: முகிலொடு கூறல்.

     (இ-ம்) இதற்கு, "கரணத்தி னமைந்து முடிந்த காலை" (தொல். கற்பி.) எனவரும் நூற்பாவின் கண் 'மீட்டுவரவு ஆய்ந்த வகையின் கண்ணும்' என்னும் விதிகொள்க.

1 - 3: கருங்குழல் . . . . . . . . . . காண்பாள்

     (இ-ள்) கருங்குழல் செவ்வாய் சிறுஇடை மடந்தைக்குகரிய கூந்தலினையும் சிவந்த வாயினையும் நுண்ணிடையையுமுடைய தலைவிக்கு; உளத்துயர் ஈந்து- நெஞ்சத்தில் துன்பத்தைக் கொடுத்து; கண்துயில் வாங்கிய ஆனா இன்னல் அழிபடக் காண்பான் - கண் உறங்குதலை நீக்கிய ஒழியாத துன்பத்தால் அவள் வருந்தலைக் காணும் பொருட்டு என்க.

     (வி-ம்.) கருங்குழற் செவ்வாய் என்புழிச் செய்யுளின்ப முணர்க. ஒன்றைக் கொடுத்துப் பண்டமாற்றாக ஒன்றை வாங்கினாற் போல உளத்துயர் ஈந்து கண்துயில் வாங்கிய என்றான். இன்னல் - துன்பம். அழிபட : ஒருசொல். அழிய என்றவாறு.

4 - 7: விரிபொரி . . . . . . . . . . சொற்று

     (இ-ள்) விரிபொரி சிந்தி மணமலர் பரப்பி - வாய்விரிந்த பொரியைத் தெளித்து நறுமணங் கமழும் மலர்களைப் பரப்பி; தெய்வக் குலப்புகை - தேவகோட்டங்களில் புகைக்குங் குங்கி