2329. தூய தூதுவ ரோதிய சொன்மறா

     நேய முற்றெழுந் தங்கவர் நீண்மனை

     வாயி றோறு நடந்துநல் வாக்கொடும்

     போயி ருந்து விருந்து புகன்றனர்.

2

      (இ-ள்) பரிசுத்தத்தைக் கொண்ட தூதுவ ராகிய நாயகம் நபிமுகம்மது முஸ்தபா றசூல் சல்லல்லாகு அலைகிவசல்ல மவர்கள் அவ்விதங் கூறிய வார்த்தைகளை மறுக்காமல் அலிறலி யல்லாகு அன்கு அவர்களும் நேசமுற்று எழும்பி அவர்களின் நீட்சியைக் கொண்ட வீட்டினது வாயில்கள் தோறும் நடந்து போயுட்கார்ந்து நல்ல வார்த்தைகளோடும் அவ்விருந் தென்னும் சமாச்சாரத்தைக் கூறினார்கள்.

2330. மறுவி நாறு முகம்மதுக் கன்புறு

     மறிவ ருமவ ரையர்க்கு முன்னருஞ்

     சிறிய தந்தைய ருமவர் சேய்களு

     முறவி னுற்றவ ருமவ ரொக்கலும்.

3

      (இ-ள்) கஸ்தூரி வாசனை யானது பரிமளியா நிற்கும் நாயகம் நபி முகம்மது முஸ்தபா றசூல் சல்லல்லாகு அலைகிவசல்ல மவர்களுக்கு அன்பு பொருந்திய அறிதற் கரிய தந்தையரான அப்துல்லா வென்பவருக்குத் தமையரும் சிறிய பிதாவும் அவரின் புத்திரர்களும் பந்துக்களிற் பொருந்தினவர்களும் அவர்களின் பந்துக்களும்.