அப்பா என்றுசொல் -- எங்கே?
     அப்பா என்றுசொல்
     அப்பா அப்பா. அப்பா
     அப்பா என்றுசொல் -- எங்கே
     அப்பா என்றுசொல்.

திப்பி வடித்த தேனைப் போலச்
சிப்பி உடைத்த முத்தைப் போல
முப்பெரு வேந்தர் வழிவந்தவனே,
முத்தமிழேஉயிராய்வந்தவனே
அப்பாவும் நானும் செய்தவ நிலத்தில்
அன்பு விளைக்க விளைந்தாய் மகனே (அப்பா)

குறள் படித்தால் அறம்பு கட்டும் -- என்
கொம்புத்தே னேஅது நாளைக்கா காட்டும்
நிறை மூன் றெழுத்தே இன்பம் கொட்டும்
நேரே உன்வாய் இன்றுதிறக்கட்டும் (அப்பா)

"அம்மா" என்றாய் பாதி தானே?
அப்பா என்மீதித் தேனே
செம்மை யாய்ச்சொல் அதனைத் தானே
செவிநான் பெற்ற பேறென்பேனே (அப்பா)

குருடன் இடத்திலும் திருடாதே ஒன்று!
கொல்லுமே உன்னை உன்நெஞ்சே நின்று    (குருடன்)

திருடன் ஒருதரம் தப்பிவிட் டாலும்
திருடித் திருடித் திருடிமேன் மேலும்
பெரிய திருடனாய் பலஆண்டின் காலம்
பெறுவான் தண்டனை! சிரிக்குமே ஞாலம்!    (குருடன்)

பசித்த போதிலும் பொறுப்பது பாங்கு
பருக்கை ஒன்றைத் திருடலும் தீங்கு
பிசைந்த கூழுக்கும் பிறர்உப்பு வேண்டாம்
பிழை செய்யும் நண்பனையும்விட்டு நீங்கு  (குருடன்)

நீபடி! நீஉழை! நீபிழை நன்றாய்
நீபிறர்க் குதவிசெய் நற்குணக் குன்றாய்
நீபடி செந்தமிழ் நூலெலாம் ஒன்றாய்
நீதமிழ்க்குள்ள பகைஎல்லாம் வென்றாய்    (குருடன்)