சூள் - சூழ். சூழ்தல் = 1. சுற்றியிருத்தல். “அறைகடல் சூழ்வையம்’’ (நாலடி. 230). 2. சுற்றி வருதல். சூழ்கதிர்வான் விளக்கும்’’ (பு. வெ. 9 16). 3. ஆராய்தல். “நின்னொடு சூழ்வல் தோழி’’ (கலித். 54). 4. கருதுதல். “புலைசூழ் வேள்வியில்’’ (மணிமே. 13:28). 5. கெடுதலை யெண்ணுதல். “கொடியவன் கடிய சூழ்ந்தான்’’ (சீவக. 261). 6. தெரிந்தெடுத்தல். “சூழ்புரவித் தேர்’’. 7. பண்ணுதல். “பாவை சூழ்ந்தும்’’ (பட்டினப். 102). 8. வரைதல். “தொய்யில் சூழிளமுலை’’ (கலித். 125).

சூழ் = 1. சுற்று. “சூழா மெட்டே யாயிர வேதி’’ (கந்தபு. அசுரர்யா. 61). 2. ஆராய்ச்சி. “கற்றார்சூழ் சொல்லுமாங் கண்டு’’ (சி. போ. 8 :1: 1). 3. தலையணி மாலை. “மென்பூச் சூழு மெழுதி’’ (திருக்கோ. 79).

சூழ் - சூழ்ச்சி = 1. தேர்ந்தெண்ணல். “போற்றார்ப் பொறுத்தலுஞ் சூழ்ச்சிய தகலமும்’’ (புறம். 2:7). 2. நுண்ணறிவு. “கருமக் கிடக்கையுங் கலங்காச் சூழ்ச்சியும்’’ (பெருங். உஞ்சைக். 46:117). 3. ஆம்புடை (உபாயம்). “சொல்லா யானுன்னைச் சார்வதோர் சூழ்ச்சியே’’ (திவ். திருவாய். 3:2;3). சூழ்ச்சி - சூழ்ச்சியம்= மதித்திறமை (ingeniousness).

சூழ் - சூழல் = 1. சூழ்ச்சி. 2. கூட்டம். “வானவர் சூழலோடு’’ (கந்தபு. மேருப். 48). 3. இடம். (பிங்.).

சூழி = 1. வட்டமான நீர்நிலை. “அலங்குகதிர் சுமந்த கலங்கற் சூழி’’ (புறம். 375). 2. கடல்.

சூழியல் = வீட்டிறப்பு. வீட்டிறப்புத் தாங்குங் கம்பு.

சூழியற்படை = வீட்டுச் சுவரின் எடுத்துக்கட்டி.

சுள் - சுட்டி = 1. குழந்தைகளும் மகளிரும் அணிந்து கொள்ளும் வட்டமான நெற்றியணி. “சுட்டி சிதையக் குட்டத்துக் குளித்து’’ (பெருங். உஞ்சைக். 40 102). 2. மாட்டின் நெற்றியிலுள்ள வெண்சுழி. “சுட்டியை நெற்றியிலேயுடைய கரிய எருது’’ (கலித். 101 21, உரை). 3. பாம்பு முதலிய உயிரிகளின் உச்சி வெள்ளை. 4. நெற்றிப்பட்டம் (அக. நி.). 5. தலைச்சுழி. 6. குறும்பு. 7. குறும்பன். ம., க., து. சுட்டி.

சுட்டி சுட்டியாக = வட்டம் வட்டமாக. அவன் உடம்பில் சுட்டி சுட்டியாக வெள்ளை விழுகிறது. (உ. வ.).

சுட்டித் தலையன் = 1. தலையிற் சுழியுள்ள குறும்பன். 2. உச்சி வெள்ளையுடைய விலங்கு.

சுட்டித்தனம் = குறும்புத்தனம்.