(இ-ள்.)  உழையாளர் - பணியாளர், வரை செய்தோள் மன்ன - வரையெனத் திரண்ட தோள்களையுடைய வேந்தே !  வணிகர் மயிடத்தால் - (அயல் நாட்டு ) வணிகர்கொண்டுவந்த எருமையினால், நம் - நம்முடைய, அரைச அன்னம் எனும் பெயர் ஆகும் - ராஜஹம்ஸம் என்னும் பெயரையுடையதாகிய, அரைச வாகன மாயது - ராஜவாஹனமாகிய குதிரை, போயது என்று - இறந்துவிட்ட தென்று, அரசற்கு -அரசனுக்கு, உரை செய்தார் - உரைத்தனர்.

செய், உவமவுருபு, அரைசவன்னம், அரைச வாகனம் இவற்றில் ஐகாரம், போலி, உழையாளர் - ஈண்டுக் குதிரையுடன் சென்றவர்.                (48)

(இ-ள்.) அணிகொள் மாமுடி மன்னன் - அழகியசிறந்த முடியணிந்த வேந்தன், அழன்றனன் - கோபமுற்றவனாகி, வணிகர் பொருள் - வணிகர் கொணர்ந்த பல பொருள்களையும், வாரி - வாரிக்கொண்டு, மயிடமும் பிணி செய்து - அவ்வெருமையையும் பிணித்து, எம் உழை - எம்மிடம், வம் என -வருக என்று, பேசினான் - கட்டளையிட்டான் சென்று - அவ்வுழையவரும் போய், கணிதம் இல்பொருள் - கணக்கிட முடியாத பொருள்களை, கவர்ந்தனர் - கொள்ளை கொண்டனர். (எ-று.)

   ஏவலர், அரசன்கட்டளையால் வணிகர்பொருள்களைக் கவர்ந்தனரென்க.

   வம், வாரும் என்பதன் விகாரம்.  அழன்றனன் முற்றெச்சம்.           (49)