இயற்பெயர் முன்வரும் ஆர்

659. 1 இயற்பெயர் முன்ன ராரைக் கிளவி
       பலர்க்குரி யெழுத்தின் வினையொடு முடியும்.

(இ-ள்.) இயற்பெயர் முன்வரும் ஆரென்னும் இடைச்சொல் பலரறிசொல்லான்
முடியும்.

(வ-று.) பெருஞ்சேந்தனார் வந்தார். (17)

மேலதற்கோர் சிறப்புவிதி

660. அசைநிலைப் பொருண்மை யாகும்வழி யறிதல்.

(இ-ள்.) ஆரையென்னுஞ் சொல், அசைநிலையாய் நிற்கு மறிக.

(வ-று.) ‘எல்லாவுயிரொடு சொல்லுமார் முதலே.’ (தொல் - எழுத் - 41) (18)

ஏ, குரை

661. ஏவுங் குரையு மிசைநிறை யசைநிலை.

(இ-ள்.) ஏயென்னும் இடைச்சொல்லும், குரை என்னும் இடைச்சொல்லும், இசை
நிறையும் அசை நிலையுந் தரும்.

(வ-று.) ‘ஏ ஏ யிஃதொத்தன்’ (கலி - 62) இசை நிறை; ஏ ஏ யெனக் கூறுக. அசை
நிலை; ‘பெறலருங் குரைத்தே’. (புறம்.5) இசை நிறை; ‘பல்குரைத் துன்பங்கள்’,
(குறள்-1045) அசைநிலை. (19)

மா

662. 2 மாவென் கிளவி வியங்கோ ளசைச்சொல்.

(இ-ள்.) மாவென்னு மிடைச்சொல் வியங்கோ ளசைநிலையாம்.

(வ-று.) உண்கமா கொற்கையோனே. (20)

முன்னிலை யசைச் சொற்கள்

663. இகுமியா யிகமதி மோசின் முன்னிலை
      அசைச்சொல் லென்மனா ரறிந்திசி னாரே.

1. தொல் - சொல் - இடை - 22.

2. ,, ,, ,, 25.