(இ-ள்.) லகரமெய்க்கு இ, உ ஆகிய விரண்டு குற்றெழுத்துக்களி லொன்று மொழிக்கு
முதலாகி முன்னர்ப்போதரும்.

(வ-று.) இலாபம், உலோபம். (24)

யகரம் மொழிக்கு முதலாகுமாறு

139. யகரக் கிகரமு மாகிமுன் வருமே.

(இ-ள்.) யகரமெய்க்கு இகரம் மொழிக்கு முதலாகி முன்னர்ப் போதரும்.

(வ-று.) இயக்கன். (25)

(வி-ரை.) 137 ஆம் நூற்பா முதல் இந்நூற்பா வரையுள்ள கருத்துக்கள்.

‘‘ரவ்விற் கம்முத லாமுக் குறிலும்
லவ்விற் கிம்முத லிரண்டும் யவ்விற்
கிய்யு மொழிமுத லாகிமுன் வருமே’’

எனவரும் (நன்னூல் - பதவி - 21) நன்னூலார் கூற்றோடு ஒத்து நிற்கின்றன.

ஈரெழுத்திணைந்து வருங்கால் வரும் முறைமை

140. இணைந்தியல் காலை யரலக் கிகரமும்
     மவ்வக் குகரமு நகரக் ககரமும்
     மிசைவரும் ரவ்வழி யுவ்வு மாம்பிற.1

(இ-ள்.) ஆரியமொழியுள் இரண்டெழுத்து இணைந்து ஓரெழுத்தைப்போல்
நடக்குங்காலைப் பின்னின்ற, ய, ர, லக்களுக்கு இகரமும், ம, வக்களுக்கு உகரமும்,
நகரத்திற்கு, அகரமும் மேலே வரும். ரகரத்திற்கு உகரமும் வரும்.

(வ-று.) வாக்கியம், வக்கிரம், சுக்கிலம்; பதுமம், பக்குவம்; அரதநம், அருத்தம். (26)

சொல்லின் வகை

141. சங்கதம் பாகதஞ் சநுக்கிர கம்மவப்
    பிரஞ்சன நான்கெனப் பேசுங் கிளவி.

1. நன்-பதவியல்-22.