சூத்திரம்-41

     பிரிவின் நீட்டம் நிலம்பெயர்ந் துறைவோர்க்கு
     உரிய தன்றே யாண்டுவரை யறுத்தல்.

என்பது என்னுதலிற்றோ எனின், தலைமகன் பிரிந்துறையும் இடத்துக்
காலவரையறை உணர்த்துதல் நுதலிற்று.

      இதன் பொருள்: பிரிவின் நீட்டம் என்பது - பிரிவினது
நெடுங்காலைச் செலவு என்றவாறு; நிலம் பெயர்ந்து உறைவோர்க்கு என்பது
- இடத்தின் நீங்கி நாடிடையிட்டும் காடிடையிட்டும் உறைவோர்க்கு
என்றவாறு; உரியது அன்றே யாண்டு வரையறுத்தல் என்பது - உரித்தன்று
யாண்டு வரையறுத்துப் பிரிதல் என்றவாறு.

      என்பதனாற் போந்த பொருள் யாதோ எனின், நாளும் திங்களும்
இருதுவும் வரையறுத்துப் பிரிப என்பது; இன்னநாளுள் வருதும், இன்ன
திங்களுள் வருதும் இன்ன இருதுள் வருதும் என்று சொல்லிப் பிரியும்
என்பது.

      நாட்குறித்துப் பிரியலுறுந் தலைமகன் பிரிவுணர்த்தப்பட்ட தோழி
சென்று தலைமகட்குச் சொல்லியதற்குச் செய்யுள்:

                 நாட்குறித்தது தோழியுரைத்தல்

  ‘கேளே பெருக்கும் அரும்பொருள் செய்தற்குக் கேடில்திங்கள்
  நாளே குறித்துப் பிரியலுற் றார்நமர் தீவிழியால்
  ஆளே கனலுங்கொல் யானைச்செங் கோலரி கேசரிதன்
  வாளே புரையுந் தடங்கண்ணி என்னோ வலிக்கின்றதே.’     (279)

      திங்கள் குறித்துத் தலைமகன் பிரிய வேறுபட்டாள் தலைமகள்;
வேறுபட, ஆற்றாள் எனக் கவன்ற தோழிக்கு, ஆற்றுவல் என்பதுபடத்
தலைமகள் சொல்லியதற்குச் செய்யுள்:

  ‘வார்ந்தார் கருமென் குழல்மங்கை மாநிதிக் கென்றகன்ற
  ஈர்ந்தா ரவரின்று காண்பர்கொல் லோஇக லேகருதிச்
  சேர்ந்தார்ப் புறங்கண்டு செந்நிலத் தன்றுதிண் தேர்மறுத்துப்
  பேர்ந்தான்¹ தனது குலமுத லாய பிறைக்கொழுந்தே’.        (280)

      என்பது என் சொல்லினாளோ எனின், ‘யான் ஆற்றேனாயன்று
வேறுபடுகின்றது. அவர் குறித்த திங்களது வரவு கண்டு தாம்
எடுத்துக்கொண்ட பொருள் முடியாது பெயர்வர்கொல்லோ என
ஆற்றேனாவது’ என்றாள் என்பது.

    (பாடம்) 1. விசாரிதன் றன்முதலாய.