இ-ள் பொருள் மயங்குதலும் உருபு மயங்குதலும் ஆகிய இருகூற்று மயக்கமும் ஆராய்ந்து அறியும் இயல்புடைய வேற்றுமை இடத்து என்றவாறு.
 

நே.சொல். 12

இது பொருள் மயக்கம் ஆமாறு கூறுகின்றது.

இ-ள்: அவ்விரு கூற்று மயக்கத்துள் பொருளின் மயக்கம் ஆவது பிறிது ஒரு வேற்றுமை உருபின் பொருளொடு பிறிது ஒரு வேற்றுமை உருபு தன் பொருளில் தீராது அப்பொருள் நிலைக்களத்துச் சென்று மயங்குதலாம் என்றவாறு.
 

தன் பொருளில் தீராது பிறிது ஒன்றன் பொருட்கண் சேறல் பொருள் மயக்கம். தொல்.சொல். 84 சேனா. உரை.
 

இஃது உருபு மயக்கம் ஆமாறு கூறுகின்றது.

இ-ள்: உருபின் மயக்கமாவது பிறிது ஒரு வேற்றுமை உருபின் பொருளொடு பிறிது ஒரு வேற்றுமை உருபு தன் பொருளின் தீர்ந்து அப்பொருள் நிலைக்களத்துச் சென்று மயங்குதலாம் என்றவாறு.