உண்டிலன்-உண்பகுதி; ட்-இறந்தகால இடைநிலை; இல்-எதிர்மறை இடைநிலை; அன்-விகுதி. உண்ணாநின்றிலன்- உண்-பகுதி; ஆநின்று- நிகழ்கால இடைநிலை; இல்- எதிர்மறை இடைநிலை; அன்-விகுதி. ‘இல்’ என்ற எதிர்மறை இடைநிலை வருமிடத்துக்காலங் காட்டும் இடைநிலை உடன் வருதலுண்டு என்று அறிக. அல் என்ற எதிர்மறை இடைநிலைக்கு இம்மரபு இன்று. உண்ணலன்- உண்-பகுதி; அல்- எதிர்மறை இடைநிலை; அன் விகுதி. பாடன்மார் எமரே-காணன்மார் எமரே-என்புழி, மார் ஈற்று வினைமுற்றுக்கள் எதிர்மறை வியங்கோள் முற்றுக்களாகவாவது ஏவல் முற்றுக்களாகவாவது கொள்ளப்படும்; பலர்பால் முற்றுக்கள் அல்ல என்பது. கரியன்-கரு+அன் என்று பிரித்தலே இவர்க்குக் கருத்தாம் என்க. செய்திகள் தொல்காப்பியச் சொல்லதிகார நச்சினார்க்கினியர் உரையையே பெரும்பாலும் உட்கொண்டவை. (204-209)
|