:: TVU ::

இடைச்சொல்இயல்-நூற்பா-5,6

401

	என என்பது உவமை எண்குணம் வினைபெயர் இசை குறிப்பு இயலும் என்றும் அற்றே.’	தொ.வி.133

	‘எண்ணே குறிப்பே இசையே பண்பே வினையே பெயரே எனஓ ராறினும் எனஎனும் மொழிவரும் என்றும்அற்றே’	மு.வீ.ஒ.8
உம்மை இடைச்சொல்
256	எதிர்மறை சிறப்புஎண் எச்சம்முற்று ஐயம் தெரிநிலை ஆக்கம் எனஎட்டு உம்மை.
இதுவும் அது. இ-ள் எதிர்மறைப் பொருண்மை முதலாக ஆக்கப் பொருண்மை ஈறாகக்கிடந்த பொருள்வகை எட்டனையும் பற்றி நிகழும் உம்மை இடைச்சொல் என்றவாறு. வரலாறு: சாத்தன் வருதற்கும் உரியன் என்பது வாராமைக்கும் உரியன் என எதிர்மறையை ஒழிபாக உடைத்தாய் நிற்றலின் எதிர்மறை உம்மை. இஃது எச்சத்தின்பால் படுமேனும், பிறிது ஒரு பொருளைத்தழுவாது ஒருபொருளின் வினையை மறுத்தலின் எதிர்மறை என அதனின் வேறு ஆயிற்று. சிறப்பு உம்மை உயர்வு சிறப்பும் இழிவு சிறப்பும் என இருவகைத்து,
	‘குறவரும் மருளும் குன்றத்துப் படினே’	மலைபடு. 275
என்பது குன்றத்து மயங்காது இயங்குதற்கண் குறவர் சிறந்தமையின் உயர்வு சிறப்பு உம்மை. இவ்வூர்ப் பூசையும் புலால் தின்னாது என்பது புலால் தின்னும் இழிவின்கண் பூசை சிறந்தமையின் இழிவு சிறப்பு உம்மை.