பாணன் பறையன் துடியன் கடம்பன் என்ற நான்கு உயர்திணைச் சொற்களும்
நால்வர் என்ற உயர்திணைத் தொகைப்பெயர் கொள்ளாது ‘நான்கு’ என்ற அஃறிணைத்
தொகை பெற்றதன் காரணம், ஈண்டு எண்ணப்பட்டன பாண்குடி- பறையக்குடி- துடிக்குடி-
கடம்பக்குடி- என்ற குடிகளே என்பது சேனாவரையர் உரைகொண்டு விளக்கப்பட்டது.
நச்சினார்க்கினியர் இவை உயர்திணைப்பொருள் நின்று அஃறிணை முடிபு
பெற்றனவேயாம் என்பர்.

தண்ணளி- தாம்- தேர்- என்ற மூன்று சொற்கள் விட்டனர் என்ற உயர்திணை
வினைகொண்டதும், தான்- தேர் - பாகன் என்ற மூன்று சொற்களும் உண்டான் என்ற
உயர்திணை வினை கொண்டதும், தான்- தேர்- என்ற இரு சொற்கள் தோன்றாநின்றனன்
என்ற உயர்திணை வினை கொண்டதும், தலைமைப் பொருளாகிய தாம்- தான்-
என்பனவற்றிற்கு உரிய வினையே தலைமையில் பொருள்கட்கும் முடிபு ஆவதொரு
முறைமை பற்றியாம் என்பதும் சேனாவரையர் நச்சினார்க்கினியர் இருவர்தம்
கருத்தேயாம். நன்னூல் விருத்தி இவை சிறப்புப்பற்றி ஆண்பால் வினை கொண்டன
என்னும்.

எடுத்துக்காட்டுக்கள் பலவும் மயிலைநாதர் உரைத்தனவே.
 

‘தானும் தேரும் பாகனும் வந்துஎன்: நலன்உண்டாள்’ என்புழி வருதல்வினை
மூன்றற்கும் உண்மையான், ஆண்டு அமைக்க வேண்டுவது இன்று இனி,
அம்முப்பொருளின் வினையாகிய வந்து என்னும் செய்து என்எச்சம் உண்டான் என்னும்
ஒன்றன் வினைகொண்டு முடிதல் வினையெச்சமுடிபு ஆராய்ச்சிக்கண் பெறற்பாலது