:: TVU ::

பொதுவியல்-நூற்பா-54

689

சொல்லெச்சம் ஏழும் எஞ்சுபொருட்கிளவி கொண்டு அல்லது அமையாமையின் எச்சம் ஆயின. குறிப்பு எச்சம் மூன்றும் ஒரு தொடர்க்கு ஒழிபாய் எச்சம் ஆயின, எஞ்சு பொருட்கிளவி எனினும் எச்சம் எனினும் ஒக்கும். பெயரெச்சமும் வினையெச்சமும் முறையானே பெயராய் வினையானும் முடிதலின் ஆகுபெயரான் அவற்றைப் பெயர்வினை’ என்றார். எச்சமாவன ஒருசார்ப்பெயரும் வினையும் இடைச்சொல்லும் ஆதலின், பெயரியல் முதலாயினவற்றுள் பத்தும் ஒருங்கு உணர்த்துதற்கு ஏலாமையின், ஈண்டுப் போதந்து கூறினார். 54
விளக்கம்
முற்கூறிப் போந்த எச்சம் என்பன பெயரியல் வினையியல் இடையியல்களில் கூறிப் போந்தன. எச்சங்கள் பொதுவியலில் கூறப்பட்ட காரணம் உணர்த்தினார்.
ஒத்த நூற்பாக்கள்
	‘பிரிநிலை வினையே பெயரே ஒழியிசை எதிர்மறை உம்மை எனவே சொல்லே குறிப்பே இசையே ஆயீ ரைந்தும் நெறிப்படத் தோன்றும் எஞ்சுபொருட் கிளவி.’ ‘பெயர்வினை உம்மைசொல் பிரிப்புஎன ஒழியிசை எதிர்மறை இசையெனும் சொல்லொழிபு ஒன்பதும் குறிப்பும் தத்தம் எச்சம் செப்பும்.’	தொல்.சொல்.430, மு.வீ.ஒ.107 நன்.360
தொன்னூல் விளக்கம் இவ்வெச்சங்களைச் சொல்லெஞ்சு என அணியுட்படுத்துக் கூறுகிறது.