சொற்கள் பகுபதம், பகாப்பதம் என்று இரு பிரிவின. பகாப்பதம் பிரிக்க
முடியாதது. பகுபதம் பிரிக்கக் கூடியது. பகுபதக் கூறுகள் பகுதி, விகுதி, இடைநிலை
சாரியை, சந்தி விகாரம் என்ற ஆறு தலைப்பில் அடங்கும்.

பகுதியாவது:-

தன்னியல்பின் நிற்பது. இது பகுபதத்தின் முதலுறுப்பு ஆதலின் முதனிலை
யெனவும் பெயர் பெறும்.

விகுதியாவது:-

பகுதியின் பொதுவாய் இருக்கும் தன்மையை வேறுபடுத்தி ஒன்றற்கே சிறப்பாக
உரியதாக்குவது. இது பகுபத இறுதி உறுப்பு ஆதலின் இறுதிநிலை யெனவும்
பெயர்பெறும்.

இடைநிலையாவது:-

பகுதிக்கும் விகுதிக்கும் இடையதாய்ப் பெரும்பாலும் காலம் காட்டி வினைக்கு
இன்றியமையாது வேண்டப்படும் உறுப்பு. பெயரிடையும் இடைநிலை அருகி வரும்.

சாரியையாவது:-

பெரும்பாலும் இடைநிலைக்கும் விகுதிக்கும் இடைப்பட்டு ஓசை எளிமைக்காகவும்
இனிமைக்காகவும் வருவது.

சந்தியாவது:-

பகுதிக்கும் இடைநிலைக்கும் இடையே ஓசை விட்டிசைக்காமல் பொருந்துவதற்
இடைவந்து புணரும் உறுப்பு. இவ்விடம் மாறி வருவதனை எழுத்துப்பேறு என்ப.

விகாரமாவது:-

பகுபதத்தின் பகுதிக்கண்ணும் சந்தி உறுப்பின்கண்ணும் ஏற்படும் வேறுபாடு
ஆகும். பிறவுறுப்பிலும் சிறுபான்மை இது நிகழும்.