இனி, கிள்ளை, மஞ்ஞை என்னுந் தொடக்கத்தன. ²ஒரு கூறு நிற்ப ஒருகூறு திரிந்தன; உந்தி, அடுக்கல் என்னுந் தொடக்கத்தன ³முழுவதூஉம் வேறுபடத்திரிந்தன. பிறவும் அன்ன.

சேனா

இ-ள் : ஒரு பொருள் குறித்துவரும் பல சொல்லும் பல பொருள் குறித்துவரும் ஒரு சொல்லும் என இருவகைப்படும் திரிசொல், எ-று.

வெற்பு, விலங்கல், விண்டு என்பன ஒருபொருள் குறித்த வேறு பெயர்க்கிளவி. எகினம் என்பது அன்னமும் கவரிமாவும் புளிமாவும் நாயும் உணர்த்தலானும்; உந்தியென்பது யாழ்ப் பத்தலுறுப்பும், கொப்பூழும், தேர்த்தட்டும், கான்யாறும் உணர்த்தலானும் இவை வேறுபொருள் குறித்த ஒருசொல்.

திரி சொல்லது திரிவாவது ¹உறுப்புத் திரிதலும் முழுவதுந்திரிதலும் என இருவகைத்து. கிள்ளை, மஞ்ஞை என்பன உறுப்புத்திரிந்தன. விலங்கல், விண்டு என்பன ²முழுவதுந்திரிந்தன முழுவதுந்திரிந்தனவற்றைக் ²‘கட்டியவழக்கு’ என்பாரும் உளர். அவை கட்டிய சொல்லாமாயின் செய்யுள் வழக்காமாறில்லை; அதனான் அவையுந்திரி வெனல் வேண்டும் என்பது.

2. ஒரு கூறு நிற்ப ஒரு கூறு திரிதல் - ஒரு சொல்லில் உள்ள எழுத்துகளுள் ஒன்றோ பலவோ எழுத்துக்கள் அப்படியே இருக்க ஒன்றோ பலவோ எழுத்துக்கள் மாறுபடுதல்-கிளி என்பதில் கி நிற்க ளி திரிந்து கிள்ளை எனவந்தது. ஒன்று நிற்க ஒன்று திரிந்தது. பிறவும் அன்ன.

3. முழுவதும் திரிதலாவது சொல்லே வேறு சொல்லாதல். மலை என்னும் பொருளையுணர்த்தும் சொல்லாக அடுக்கல் என்பது வந்தது காண்க.

1. உறுப்புத்திரிதல்-ஒன்று அல்லது பல எழுத்துத்திரிதல்.

2. கட்டியவழக்கு-புதியதாக ஆக்கிக்கொண்ட (சொல்) வழக்கு.