‘பொற்றொடி வந்தாள்’ என்றவழிப் பொற்றொடியை அணிந்தாள்மேல் பொருள் நின்றலின் அம்மொழியல்லாத மொழி மேற்பொருள் நின்றது.

இவை நான்கும் வேற்றுமைத்தொகை ஏனைத்தொகைக் கண்ணும் பொருள் நிற்குமாறு ஏற்பனவற்றுட் கண்டு கொள்க.

நச்

இது தொகைச் சொற்பொருள்நிலை கூறுகின்றது.

இ-ள் : அவைதாம் பொருள் நிலைமரபு-அத்தொகைச் சொற்கள்தாம் பொருள் பெற்று நிற்கும் நிலைமையினது முறைமையினை, முன்மொழி நிலையலும்-முன்மொழிக்கண்ணே பொருள் சிறந்து நிற்றலும், பின்மொழி நிலையலும்-பின் மொழிக்கண்ணே பொருள் சிறந்து நிற்றலும், இருமொழி போலும் ஒருங்கு உடன் நிலையிலும்-இருமொழிக்கண்ணும் பொருள் ஒருங்கு சிறந்து நிற்றலும், அம்மொழி நிலையாது அன்மொழி நிலையலும்-அவ்விருமொழிக்கண்ணும் பொருள் சிறந்து நில்லாது மற்றோர் மொழிக்கண்ணே பொருள் சிறந்து நிற்றலும், அந்நான்கு என்ப-என்று சொல்லப்பட்ட அந்நான்கு கூறு என்று சொல்லுவர் ஆசிரியர், எ-று.

உ-ம் : வேங்கைப்பூ - முன்மொழி நிலையல்; அது ‘நறிது’ என்பதனோடு கூட்ட வேங்கைக்கண் பொருள் சிறவாது பூவின் கண் பொருள் சிறத்தலின்,

பெண்ணணங்கு என்பது அணங்கு போலும் பெண் என்பதாகலின் பின்மொழி நிலையலாம். இவை உவமத்தொகை.