இளம்

இச்சூத்திரம் என்னுதலிற்றோவெனின், நிரனிறைப் பொருள்கோள் ஆமாறு உணர்த்துதல் நுதலிற்று.

உரை : இச்சொல்லப்பட்டவற்றுள் நிரனிறையென்று சொல்லப்படுவது யாதோ வெனின், வினையினானும் பெயரினானும் ஆராயத் தோன்றிச் சொல் வேறு வேறு நிற்பப் பொருள் வேறு வேறு நின்று உணரப்படும், எ-று.

அவற்றுள் வினையிற் றோன்றியது :-

¹“உடலும் உடைந்தோடும் ஊழ்மலரும் பார்க்கும்
கடலிருளாம் பல்பாம் பென்னக்-கெடலருஞ்சீர்த்
திங்கள் திருமுகமாய்ச் ²சேர்ந்து”

என்பது உடலும் உடைந்தோடும் பார்க்கும் மலரும் என்ற வினைச் சொற்கள் தம்முள் பொருளியைபு இன்றி வேறு நின்றன. இனிக் கடல் இருள், ஆம்பல் பாம்பு என நின்ற பெயர்ச் சொல்லும் அவ்வாறே நின்றமை அறிக.

அவை தம்முள் பொருள் இயையுமாறு : உடலுங் கடல், உடைந்தோடும் இருள், மலரும் ஆம்பல், பார்க்கும் பாம்பு எனக் கூட்டுக.

இனிப்பெயர் நிரனிறை வருமாறு :

“கொடி குவளை கொட்டை நுசுப்பு உண்கண் மேனி” எனவரும். இனி அவை பொருள் கொள்ளுங்கால், கொடி நுசுப்பு, குவளை உண்கண், கொட்டைமேனி என வரும்.

1. பொருள் : அழகிய முகத்தைத் திங்களாகக்கருதி கடல் பொங்கும்; இருள் உடைந்தோடும்; ஆம்பல் முறையாக மலரும்; பாம்பு கவ்வப்பார்க்கும் இது சிந்தியல் வெண்பா. இதை நேரிசை வெண்பாவாகத் திரித்துக் காட்டினர் தெய்வச்சிலையார்.

2. செத்து-பாடம்.