கருத்து : இது வஞ்சித்திணையின் துறைவகையும் அவற்றின் தொகையும் கூறுகின்றது.

பொருள் : இயங்குபடை யரவம் = போர்மேற் செல்லும் தானையின் ஆர்ப்பும்;

“உரவுமண் சுமந்த அரவுத்தலை பனிப்பப்
பொருநர் ஆர்ப்பொடு முரசெழுந் தொலிப்ப
இரவிடங் கெடுத்த நிரைமணி விளக்கின்
விரவுக் கொடி யடுக்கத்து நிரயத் தானை. ”

சிலப். கால்கோள். 34-37

“ஏற்றுரி போர்த்த வள்வார் இடுமுர சறைந்த பின்னாட்
 காற்றெரி கடலிற் சங்கு முழவமு முரசு மார்ப்பக்
 கூற்றுடன் றனைய தானை கொழுநில நெளிய வீண்டிப்
 பாற்கடற் பரப்பின் வெள்வாட் சுடரொளி பரந்த வன்றே. ”

சிந்தா. மண்மகள் இலம். 51

முன் வெட்சித்திணைத் துறையாய்க் குறிக்கப்பட்ட நிரைகவர விரையும் படை யியங்கரவத்தின் வேறாய், போர்மேற் செல்லும் தானையின் ஆரவாரம் இதில் கூறப்பட்டது. வெட்சியிலாகோள் களவில் நிகழ்வதாகலின், ஆர்த்துமேற் செல்வதற்கேற்புடைத்தன்று; அதனா லாங்கு வேந்துவிடு முனைஞரின் கரவியக்கத் தியலரவங் குறிக்கப் படையியங்கரவம் எனப்பட்டது. வஞ்சித்தானை வெளிப்பட விருதுடன் ஆர்த்துப் போர்க்கெழுமாதலின் படை அரவமெனவும், அது போரார்ப்பின் வேறாதலின் “16. 0pt; line-height: >இயங்குபடையரவ மெனவும் விளக்கிய செவ்வி வியத்தற் குரித்து.