தலைவன் வாராமை நமக்குத் துன்பத்தை இன்று தருவதாயினும், பின்நலம்பயக்கும்” என்று தலைவி கூறினாள்.

     தில்ல: விழைவின்கண் வந்த தில்லென்னும் இடைச்சொல் ஈறு திரிந்தது.

     சிலம்பிற்சிலம்பும் - மலைப்பக்கங்களில் எதிரொலியுண்டாக்குமெனினும் அமையும்.

     மேற்கோளாட்சி 1. ‘மங்குல்ஞாயிறு - இருளைக் கெடுக்கும் ஞாயிறு; இதனை, நோய்மருந்தென்றாற் போலக் கொள்க’ (பரி. 13:1, பரிமேல்).

     ஒப்புமைப் பகுதி 1-2. வேலன் நோய் மருந்து அறியாமை: “தோற்றமல்லதுநோய்க்குமருந் தாகா, வேற்றுப்பெருந் தெய்வம் பலவுடன் வாழ்த்தி” (குறுந். 263:3-4); “அறியா வேலற் றரீஇ யன்னை, வெறியயர் வியன்களம்பொலிய வேத்தி” (அகநா. 242:10-11).

     3. அரும்படர்: அகநா. 72:21.

     4. வாரற்க தில்ல: குறுந். 198:8. ஒப்பு.

     3-4. தலைவி வருந்தினாலும் தலைவன் வாராமை நன்று: “ஆய்மலர் மழைக்கண் டெண்பனி யுறைப்பவும் வேய்மருள் பணைத்தோள் விறலிழை நெகிழவும், அம்பன் மூதூ ரரவ மாயினும் .... வாரற்க தில்ல தோழி .... ஓங்குமலை நாடனின் னசையி னானே”, “மென்றோணெகிழ்ந்துநாம் வருந்தினு மின்றவர், வாரா ராயினோ நன்றுமற் றில்லை” (நற். 85:1-11, 255:6-7).

     5. தினைக்கதிர்க்குப் பிடியின் கை: குறுந். 198:3-4, ஒப்பு.

     5-6. தினையைக் கிளி உண்ணுதல்: குறுந். 133: 1-2.

     தினையிற் கிளி கடிதல்: குறுந். 198: 4-5, ஒப்பு.

     தலைவி குளிராற் கிளி கடிதல்: குறுந். 291:1-2, ஒப்பு.

(360)

தலைவி கூற்று

(வரைவுக்குரிய முயற்சிகள் நிகழாநிற்ப, “இதுகாறும் நீ தலைவன் பிரிவை நன்கு ஆற்றினை” என்று கூறிப் பாராட்டிய தோழியை நோக்கி,“அவர் மலையிலிருந்து வந்த காந்தளை வளர்த்து ஆற்றினேன்” என்று தலைவி கூறியது.)

361.	அம்ம வாழி தோழி யன்னைக்
	குயர்நிலை யுலகமுஞ் சிறிதா லவர்மலை
	மாலைப் பெய்த மணங்கம ழுந்தியொடு
	காலை வந்த காந்தண் முழுமுதல்
5	மெல்லிலை குழைய முயங்கலும்
	இல்லுய்த்து நடுதலுங் கடியா தோளே.

என்பது வரைவுமலிந்தவழித் தோழி “நன்காற்றினாய்” என்றாட்குக்கிழத்தி சொல்லியது.

கபிலர்.