வேந்தே, நின் யானைப்படை செல்லக் கண்ட வேந்தர் தத்தம் மதில்
வாயில்கட்குப் பழைய கதவுகளை மாற்றிப் புதுக் கதவுகளை நிறுத்திப்
புதிய  கணைய  மரங்களை  யமைக்கின்றனர்; குதிரைப் படையைக்
கண்டவர்  காவற்காட்டின்  வாயில்களைக்  கவைத்த  வேல்
முட்களைப் பெய்து அடைக்கின்றனர்; வேற்படை கண்டவர் தம்
கேடகங்கட்குப் புதிய காம்பும் கைந்நீட்டும் செறிக்கின்றனர்; மறவரது
பெரும்  படை  கண்டவர்   தம்தம்  தூணிகளில் அம்பை யடக்கிக்
கொள்கின்றனர்; நீயோ கூற்றத்தனையை; இனி நின் பகைவரது வயல்
வளம்  சிறந்த  நாடு  அவர்  மனம் வருந்தி யிரங்குமாறு கெடுவது
திண்ணம்”என இவன் படைச் சிறப்பும் பகைவர் நாட்டழிவு குறித்த
இரக்கமும் தோன்றப் பாடியுள்ளார்.

     திணை: வாகை. துறை: அரசவாகை. திணை வஞ்சியும், துறை:
கொற்றவள்ளையுமாம். அவனை அவர் பாடியது.

     உரை: முனைத்  தெவ்வர்  முரண் அவிய - போர் முனைக்
கண் பகைவரது மாறுபாடு அடங்க; பொரக்குறுகிய நுதி மருப்பின்
நின்  இனக்  களிறு - பொருதலால்  தேய்ந்து  குறைந்த
நுனையுடைத்தாகிய  கோட்டையுடைய நினது இனமாகிய யானை;
செலக் கண்டவர் - போகக் கண்ட பகைவர்; மதிற் கதவம் எழுச்
செல்லவும் - தமது மதில்வாயிற்