20. சேரமான் யானைக்கட்சேய் மாந்தரஞ்சேர லிரும்பொறை

     ஆசிரியர் குறுங்கோழியூர் கிழார் இப்பாட்டின்கண் யானைக்கட்சேய்
மாந்தரஞ்சேரல் இரும்பொறையின் செங்கோலாட்சியின் செம்மையைப்
புகழ்ந்து, “செம்மலே, நீ அறம் துஞ்சும் செங்கோலையுடைய; அதனால்
நின்னாட்டவர் புதுப்புள் வரினும் பழம்புள் போகினும் நடுக்கம் சிறிதும்
இலராய் இன்பத்திலே திளைத்திருக்கின்றனர். அவர்கள் நின்செம்மைப்
பண்பு கருதி நின்னுயிர்க்கு ஏதேனும் ஏதம் வருமோ வென எண்ணி
அன்பால் அஞ்சியிருக்கின்றனர்காண்” எனப் பாராட்டுகின்றார்.

     திணையும்  துறையும்  அவை.  சேரமான்  யானைக்கட்சேய்
மாந்தரஞ் சேர லிரும்பொறையைக் குறுங்கோழியூர் கிழார் பாடியது.

     உரை: இரு முந்நீர்க் குட்டமும் - பெரிய கடலினது ஆழமும்;
வியன் ஞாலத் தகலமும் - அகன்ற உலகத்துப் பரப்பும்; வளி வழங்கு
திசையும் - காற்றியங்குந் திசையும்;  வறிது  நிலைஇய  காயமும் -
வடிவின்றி நிலைபெற்ற ஆகாயமும்; என்ற ஆங்கவை - என்று
சொல்லப்படுமவற்றை;