(இ - ள்.) இ இடத்து உள விலங்கு இறந்த - இந்தக்
காட்டிலுள்ள மிருகங்களெல்லாம் இறந்து போயின, எறி வேல்
பிழைத்தும் வலை பீறியும் - எறியப்பட்ட வேல்களுக்குத் தப்பியும்
வலைகளைக் கிழித்தும், வெவ்விடக் கணைகள் தப்பியும் -
கொடுமையான விடந்தோய்க்கப்பெற்ற கணைகளுக்குப் பிழைத்தும்,
சில விலங்கு போக உள ஆயினும் - சில மிருகங்கள்
ஓடிப்போயிருந்தாலும், அவ்விடத்தினில் நடப்பதோ? -
அவ்விடங்களுக்கு நடந்து செல்வதோ? புகுவதோ - காட்டுக்குள்
நுழைவதோ, நகரி அணைவதோ - அயோத்தி நகருக்கு உங்களுடன்
வருவதோ?, எவ்விடத்து இனிது சேர்த்தும் - எந்த இடத்திற்கு
மகிழ்ச்சியோடு வருவோம், என்றுஅவர் விளம்ப - என்று அவ்
வேடர்கள் கேட்க, மன்னவன் இயம்புவான் - அரிச்சந்திரன் கூறுவான்.

     எறி வேல் : வினைத்தொகை : ஓகாரம் : வினா, சேர்தும்
தம்மைப் பன்மை வினைமுற்று. வேடர்கள் 'நாங்கள் இனிமேல் எங்குச்
சென்று என்ன செய்யவேண்டும்' என்று அரிச்சந்திரனை வினவினர்,
எப்போது அவன் கூறுவான் என்பது.
                                                    (30)

 

551.	சென்ற சென்றதிசை தோறும்யா மினிது    சென்று திண்டிறல் விலங்கெலாம் கொன்று கொன்றவை முடிந்த பின்வருத    லாகு முன்னிய குறிப்பெனக் கென்று தேரின்மிசை ஏறியே இறைவ    னேக லுங்கழல் இறைஞ்சியே நின்ற வேடுவர் பெரும்ப டைத்திர    ணெருங்கு கானிடைப் பரந்தவே.

     (இ - ள்.) திண் திறல் விலங்கெலாம் - மிகுந்த வன்மையுடைய
மிருகங்களெல்லாம், சென்ற சென்ற திசை தோறும் - அவை போன
போன திக்குகளில் எல்லாம், யாம் இனிது சென்று - நாமும்
இனிமையாகத் தொடர்ந்து போய், கொன்று கொன்று - அவற்றை
எல்லாம் கொன்று, அவை முடிந்தபின் - அவை எல்லாம் இறந்த பின்பு,
வருதலாகும் - நாங்கள் நாட்டிற்கு வருதல் தக்கது, முன்னிய குறிப்பு
எனக்கு என்று - இஃதே எனக்குத் தோன்றிய கருத்து என்று, தேரின்
மிசை ஏறியே இறைவன் ஏகலும் - தேரில் ஏறிக்கொண்டே அரசன்
சொல்லிச் செல்லலும், கழல் இறைஞ்சியே நின்ற வேடுவர் - அவன்
திருவடிகளைத் தொழுதுகொண்டே நின்ற வேடர்களும், பெரும் படைத்
திரள் - பெரிய படைக் கூட்டங்களும், நெருங்கு கானிடைப் பரந்த -
அடர்ந்த காட்டிற்குள் பரவிச் சென்றார்கள்.

     அடுக்குகள் பன்மைபற்றி வந்தன; திண்டிறல்; பண்புத்தொகை;
விலங்கு : சாதியொருமை. வேடுவர் படைத் திரள் : உம்மைத்தொகை.
அரசன் கூறிய குறிப்பைக் கேட்டு அவன் குறிப்பின் வழியே
வேடுவர்களும் கானகத்திற் பரவிச் சென்றார்கள் என்பது.
                                                    (31)