ஏனையபுல்லும், மரமும் முதலிய பூதகாரியப் பொருள்களாகிய உடம்பின்
வகைகளையும் திருமேனியில் உள்ள உரோமங்களிடமாகத் தோற்றுவித்துக்
கத்தூரி தோய்ந்த பொலிவுள்ள கூந்தலையுடைய அம்மையார் மாமரத்தின்
நீழலில் எழுந்தருளியுள்ள தூயகங்கை தங்கிய சடைமுடி வள்ளலை
மெய்யன்பொடுந் தொழுதனர்.

     வணங்கிய அம்மையைத் தூய மடித்தலத்தில் இருத்திக் கொண்டு
எல்லாப்பொருள்களுமாகிய உலகத்திற்கு முன்னுள்ளோர் மாமரத்தின்
நீழலில் சிறந்த மணி ஆசனத்தின்மேல் விளங்கி வீற்றிருந்தனர். இவர்
இங்ஙனமாகலின், எல்லாவுயிர்களும் துன்பம் நீங்கி மகிழ்ச்சியொடும்
வளர்ந்தன.

மூவர் வரம்பெறல்

     பிரமன் முதலாகிய கடவுளர் மூவரும் இலளிதாதேவியினிடத்துத்
தோற்றிய அந்நிலையே உறங்கி விழித்தவரை ஒப்ப வேள்வியில் அவியாக
இடு முன்னர் விளங்கிய தூய அறிவினைஉடையராய் அம்மை அப்பர்
திருவடிகளை வணங்கித் துதிசெய்தனர்.

அறுசீரடி யாசிரிய விருத்தம்

     அலைகளையுடைய திருப்பாற்கடல் உமிழ்ந்த வடவானலத்தை ஒக்கும்
விடத்தைப்பருகி அந்நாள் எங்களை அருள்செய்து காத்தனை. மேலும்,
இந்நாள் ஓர் பண்டாசுரனால் நேர்ந்ததுன்பம் நீக்கி வலியுடைய அடிமையேம்
உயிர்கள் அனைத்தினையும் பிழைக்குமா றுட்கொண்டு மேன்மைமிகுந்த
அருள் மீக்கூர்ந்த வள்ளலே வணக்கம்.