இறைவன் காப்புநடனங் காட்டுதல்

கலிநிலைத் துறை

     குற்றமற்ற தவத்தைப் பன்னெடு நாள் செய்து பேரன்பினைப்
பெருக்கிய சிந்தையராகிய திருமாலிடத்துத் திருவருள் தங்க வழங்கிப் பாச
பசு ஞானங்களால் பற்றலாகாத வள்ளலார் பல்லுயிர்களையும் காக்கும் சர்வ
ரட்சா நடனத்தை அவர்க்குக் காட்டினர்.

     செறிந்த இருட் குழாத்தை முகந்துண்டு வெவ்விய கிரணத்தை
உமிழ்ந் துயர்கின்ற சூரியர் ஆயிரவர் ஓரிடைக்கூடினாற் போல ஒளி வீசும்
ஞானமாகிய அழகிய அம்பலத்தில் பக்கம் எங்கும் செல்கின்ற ஒளிவிரிக்கும்
கதிர்களைப் பரப்பி,

     அவ்வம்பலத்திற்குப் பெறலரிய அணிபோல அழகு செய்து புனையப்
பெறும் திருநீற்றொளி விளங்கிய திருவுரு விளங்கவும், மெய்யறிவினர்
விடுதற்கரிய திருவடிகளில் செறிக்கப் பெற்ற ஒலிக்கும் வீரக் கழல் கலின்
கலின் கலின் என்னும் ஒலி யெழவும்,

     நீண்ட செஞ்சடை திசைகள் எட்டினும் சுழலவும், பொருந்திய
கங்காநதி நீர் ஒலித்துத் திவலைகள் சிந்தவும், இனிய அருள் மிகுந்த
புன்னகையின் இள நிலவு அரும்பிச் சார்ந்து துதி செய்வோர் தம் உயிரைக்
கொள்ளை கொள்ளவும்.