தாமரை மலரை ஒக்கும் ஒளியுடைய திருமுகம் மலரவும், கடைக் கண்
அருள் சிவகாமி அம்மையாரிடத்துப் படரவும், ஐம்பெரும் பூதங்களையும்
ஆக்கவும் நிறுத்தவும் அழிக்கவும் வல்ல கெடலரிய புகழையுடைய குறளர்
குழாம் கைகொட்டித் தோள்புடைத் தாடவும்,

     குறைபாடில்லாத பசிய கொடியைப்போல ஒதுங்கி நின் றொரு பக்கம்
வாசனை வீசுகின்ற கூந்தலையுடைய சிவகாமியம்மை நோக்கிக் கண்கள்
களிப்புறவும், தேவர் கற்பக மலர்களை மழையொப்பப்பொழியவும்,
எவ்விடத்தும் அர அர சய சய (வெல்க) என்னும் பொருளுடைய ஒலி
தழைக்கவும்,

     வீக்கிய வார் முரசம் முதலிய வாச்சியங்களைப் பூத கணங்கள்
எண்திசை யானைகளும் விண்ணவரும் செவிடு படும்படி முழக்கவும், தேன்
பாய்வ தொப்பச் செவிநிரம்பத் தித்திக்கும் சுவையுடைய இனிய கிளை
என்னும் நரம்புடைய யாழைக் கின்னரர் மீட்டவும்,

     வேதம் பலவும் ஒரு புறமும், குடம்போலும் வெண்சங்குகள் பலவும்
ஒருபுறமும், மங்கல மிகும் பல்வகை மத்தளங்கள் ஒரு புறமும் ஆகப் பெரு
நீரையுடைய கடல் பலவற்றின் ஒலியை ஒப்ப ஒலிக்கும் ஒலி பெருகவும்,

     ஞானத் திருக்கூத்தைக் காணுதலும் புளகம் அரும்பிய திருமேனியராய்
நீர் வாரும் விழியினராய்த், தோத்திரம் நவிலும் நாவினராய், அஞ்சலி
குவித்த கரத்தினராய் மணத்தையுடைய சிறியதுழாய் மாலையை முடியிற்
சூடிய திருமால் பூமியிற் படிய வீழ்ந்தனர்.