பயிலல் - படிதல் இவற்றால் முயற்சியினது சிறப்பும், பாய்தல் -
சாய்தல் இவற்றால் சினத்தின் இழிபும் குறித்தவாறு. சோலையும் வாவியும்
அடுத்துள்ளன என்பதும் குறிப்பு. இது முன்னரே விளக்கப்பெற்றது.

     இனி, களி வண்டு - உயர்ந்த இடத்தில் (சோலையில்) வாழ்ந்து,
உயர்ந்த உணவை (தேனை) உண்ணுதலால் உயர்ந்தகுணமும் செயலும்
மகிழ்ச்சியுடையது என்பார் களிவண்டு என்றார். (களி - மயங்கிய - என்று
உரைப்பாருமுளர்.) இதற்கு மாறாய்த் தாழ்ந்த இடத்திலே (வாவி) வாழ்ந்து,
தாழ்ந்த உணவை (அழுக்கு, பாசி முதலியன) உண்ணுதலால் தாழ்ந்த குணமும்
தாழ்ந்த செயலுமுடையது கயல் மீன் என்பதும் குறிப்பார் பாய் கயல் என்றார்.
இவ்வுண்மையை மனிதர் உலக வாழ்க்கையிலும் பொருத்திக்காண்பது
பயன்தரும் என்பதும் குறிப்பு. இந்நாட் புதிய சீர்திருத்தங்கள் பேசுவோர்
இதனை உய்த்துணர்வாராக.

                                               வேறு