கூறினார்; இதனால் ஏனைய எல்லாமடக்கிக் கொள்ளப்படும். வேதியர் வேத வேள்விச் செயல் பற்றி முன் 1904 - 1905 - 1907 பாட்டுக்களிற் கூறினாரதலின் அதற்கேற்ப அவர் மகளிரும் தத்தம் கணவருடன் கலந்து வேள்விக்காவன முறை புரிகின்றனர் என்று கூறியபடி. மனைவேள்விகள் கணவன் மனைவி இருவரும் கூடிச் செய்யற்பாலது என்பது விதி.

     சுதை ஒழுக்கம் - வெண் சுண்ணக்கோலம் (மாக்கோலம் என்பது இந்நாள் வழக்கு) ஒழுக்கி யிடுதற்பாலது.

     கனை வானம் - கனைத்தல் - சத்தித்தல்; வானம், ஒலி என்ற ஒரே குணமுடையது.

     முகிற் கூந்தல் - உருப் பற்றி வந்த உவமம். "மஞ்சு தழைத்தென வளர்ந்த மலர்க் கூந்தல்" (894) என்ற விடத்திற் போலப் பயனுவமமுமாம்.

     வட மீன் - அருந்ததி; கற்புக்கிலக்கியமாகக் கூறப்படும் வான மீன். கதிர் செய்தல் - ஒளியால் விளங்குதல். இப்பாட்டால் அந்நகர் மாடங்களின், சிறப்பும் இல்வாழ்க்கை நலமுடைய மறையோர் மகளிர் சிறப்பும் கூறப்பட்டன. முன் பாட்டுக்களிற் புறநகர்ச் சிறப்புக் கூறிவந்த ஆசிரியர், உண்ணகரச் சிறப்புப் பற்றிக் கூறப்புகுகின்றனர்.

     (இ-ள்.) வேள்வி புரி சடங்கதனை - வேள்விகளிற் செய்யும் சடங்குகளை; விளையாட்டு.....அமைத்து - தாம் விளையாடும் இடங்களிலெல்லாம் மண்ணின் புழுதிபொருந்தும்படி வகுத்து அமையச் செய்து; பொன் புனை...ஊர்ந்து - பொன்னாலியன்ற கிண்கிணிகள் சத்திக்கும்படிச் சக்கரம் பூட்டிய அழகிய சிறு தேர்களை ஊர்ந்து; அவ்விரதப் பொடி ஆடும் - அந்தத் தேரூர்தலினால் கிளம்பிய மண் துகள் படிய விளையாடுகின்ற; வாழி வளர்.....மறுகு - வாழும்படி வளர்கின்ற மறைச் சிறுவர் நெருங்கியிருக்கப் பெற்றுள்ளன அழகிய தெருக்கள்.

     (வி-ரை.) வேதியர்களையும் அவரது மகளிர்களையும் முன்னர் வேள்வி பற்றிச் சிறப்பித்துக் கூறிய ஆசிரியர், அதனையே தொடர்ந்து அவர்தஞ் சிறார்களது சிறப்பினையும் அத்தன்மை பற்றியே கூறுகின்றார். பெற்றோரது வாழ்க்கையின் இயல்பினைக் கண்டு அதனையே பின் பற்றுவது அவ்வச்சிறாரினியல்பாகும் என்ற உண்மையும் காண்க.

     வேள்வி புரி சடங்கு அதனை - வேள்விக்கண் புரியும் என ஏழனுருபு விரிக்க. புரி சடங்கு - பெரியோர்கள் புரியும். சடங்கு - சடங்குகள். பால்பகா அஃறிணை. அது - பகுதிப்பொருள் விகுதி,

     விளையாட்டுப் பண்ணை - விளையாடும் இடம்; ஆடிடம்; பண்ணை - இடம் என்ற பொருளில் வந்தது என்பர். பண்ணை - கூட்டம் என்று கொண்டு விளையாடும் கூட்டந்தோறும் என்றலுமாம்.

     பூழியுற வகுத்து அமைத்து - பூழி - புழுதி - மண்; யாகசாலை, வேதிகை முதலியவற்றை ஆடிடத்தில் மண்ணால் வகுத்தலும் அமைத்தலும் செய்து, வகுத்தல் - இடம் அளவு படுத்தல். அமைத்தல் - அதனுள் வேதிகை முதலியவற்றைக் கூறிட்டு நிறுவுதல். சிறு தேர் ஊர்ந்து - இதனால் அவ்வாறு ஆடும் சிறாரின் பருவங் கூறப்பட்டது. 3-வது மாதம் முதல் ஒற்றைப்பட 21-வது மாதம் முடியப் பத்துப்