காண்க; "மன்றல் கமழு மலர்ப்புன்னை மணஞ்சூழ் சோலை யுப்பளத்தின், முன்றிறோறுஞ் சிறு மடவார் முத்தங் கொழிக்கும் மறைக்காடு" (1529).

     கடற்கானல் - கானல்போல அகன்ற கடற்கரை; கழிக்கானல் என்பதும் காண்க; மக்கள் குடியில்லாத தன்மையும், துர்க்கையின் (காடுகாள்) இடமாகியகாடாதலும் குறிப்பு; நம்பிகள் தேவாரம் பார்க்க.

     அரும் தமிழ் மாமறை - திருப்பதிகம்; பதிகப்பாட்டுக் குறிப்புப் பார்க்க.

     கொண்டல்பயில் மணற்கோடு சூழ் - கடிய கடற்காற்றினாற் றிரட்டப்பட்ட மணல்மேடுகள் குன்றுகள்போல உயர, அவற்றின்மேல் அங்குக் கடலினின்றும் நீர் பருகிக் கிளம்பும் மேகங்கள் பயின்று செல்வன; இங்கு மழையும் மணல் மலைகளும் இன்றும் காணவுள்ள இதன் தன்மையணிநயம் கண்டு களிக்க; "கடிதாய்க் கடற்காற்றுவந் தெற்றக் கரைமேல்" (நம்பி - தேவா).

     தொண்டருடன் தொழுது - கோடிக்குழகர் இடம் வேறு குடிகளும் தொண்டர்களும் இல்லாத குறிப்புப்பெறத் தம்முடன் வந்த தொண்டர்களோடும் தொழுது என்றார்.

     தொண்டருடன்...தோன்றலார் - இவ்வடி முற்றுமோனை; சோழநாட்டுக் காவிரித் தென்கரைத் தலங்கள் இதனுடன் முற்றுப்பெறும் நிலையின் குறிப்புப்போலும்; மேலே வரும் திருக்கடிக்குளம், திருஇடும்பாவனம், திருஉசாத்தானம் என்பவை பாண்டிநாடு செல்லும் வழியில் அமைந்தவை.

     தொழுது அணைந்தார் - தொழுது மேற்சென்றனர்.

     தோன்றலார் - பெருமையுடையார்; தலைவர்; சீகாழியில் வந்தவதரித்தவர் என்ற குறிப்புமாம்.

     பதிகக் குறிப்பு :- (1) அகத்திய முனிவர்க்காக அம்மையுடன் மணவாளக்கோலம் கொண்டெழுந்தருளிய இறைவரை இங்கு வழிபடுபவர்களது வினை மாயும்.

     பதிகப் பாட்டுக் குறிப்பு :- (1) வாடிய வீந்த; கொள்ளி - வீந்தாரை இடுகாட்டுள் எரிக்கும் குறைக்கொள்ளி; அதனை இறைவர் ஆடும்போது கைவிளக்குப் போலப் பேய்க்கணங்கள் பிடித்துச் சூழ்வன; "பேயுயர் கொள்ளி கைவிளக்காகப் பெருமானார், தீயுகந்தாடல்" (பிள் - குறிஞ்சி - சிராப்பள்ளி - 7); எரிப்பதற்கேயன்றி விளக்கும் ஆக; - (2) துன்னம் - தைத்தல்; உடை - கோவணவுடை - "துன்னம்பெய் கோவணமாக் கொள்ளுமது" (திருவா - சாழல்); உன்னம் - உன்னுதல்;