வர்களை வழிபட்டனர்; அதன் பயனால் ஆளுடைய பிள்ளையாரது திருவடி
வழிபாட்டினை யடைந்தனர்; அதன் பயனாக இறைவரது உலகினை எய்திக்
கணநாதராகித் திருத்தொண்டின் நிலைபெற்றனர் என்றிவ்வாறு காரண காரிய முறையிற்
கண்டுகொள்க.
|
சரியை நிலையினாற் சங்கம வழிபாடும், அதனால் குருவழிபாடும், அதன்மூலம்
இறைவனை யடைதலும் வருவன என்ற ஞானநூல் உண்மைகளையும் ஈண்டு வைத்துக்
கண்டு கொள்க.
|
சுடர் - ஞானவொளி; “பொன்னின் வெண்டிருநீறு புனைந்தென”வெள்ளிய
ஒளிவீசுதல்.
|
மானம் - பெருமை; நன்மை - சிவச்சார்பு; பெருமை - பெருவலிமை (16).
|
வழித்தொண்டு - முற்செய் தவத்தின்வழி முன்கூறியபடி தொடர்புண்டுவரும்
திருத்தொண்டு.
|
நிலைபெறுதல் - மீளாத நிலையடைதல். 6
|
| 3929. | உலக முய்யநஞ் சுண்டவர் தொண்டினி லுறுதிமெய் யுணர்வெய்தி
அலகி றொண்டருக் கறிவளித் தவர்திற மவனியின் மிசையாக்கும்
மலர்பெ ரும்புகழ்ப் புகலியில் வருங்கண நாதனார் கழல்வாழ்த்திக்
குலவு நீற்றுவன் கூற்றுவனார்திறங் கொள்கையின்மொழிகின்றாம்.
|
(இ-ள்) உலகமுய்ய....எய்தி - உலகுயிர்களுய்யும் பொருட்டு விடத்தினை உண்ட
சிவபெருமானது திருத்தொண்டின் உண்மைத் திறத்தில் உறுதியாகிய மெய்யுணர்ச்சி
பொருந்தப்பெற்று; அலகில்....வாழ்த்தி - அளவில்லாத தொண்டர்களுக்கு அவ்வவர்
தொண்டில் அறிவு அளித்து அவர்களது திறங்களை உலகிலே ஆக்கும் விரிந்த பெரும்
புகழினையுடைய சீகாழியில் அவதரித்த கணநாதனாருடைய திருவடிகளைத் துதித்து;
குலவு...மொழிகின்றாம் - விளங்கும் திருநீற்றுச் சார்பு பூண்ட வண்மையுடைய
கூற்றுவநாயனாரது திறத்தினைக் கொள்கையின்படி மேற்சொல்லப் புகுகின்றோம்.
|
(வி-ரை) இது கவிக்கூற்று. ஆசிரியர் தமது மரபுப்படி இதுவரை கூறிவந்த
சரிதத்தினை வடித்தெடுத்து முடித்துக்காட்டி, இனி, மேற்கூறப்புகும் சரிதத்துக்குத்
தோற்றுவாய் செய்கின்றார்.
|
உலகமுய்ய நஞ்சுண்டவர் - தேவர்களுய்ய நஞ்சு உண்டதனை உலகம் உய்ய
என்றார்; தேவர்களுய்தி பெற்று அவ்வவர்க்குப் பணித்த உலககாவலைச் செய்ய
நின்றாராதலின்; அன்றியும் தேவருய்ய உண்டருளிய கருணையை உலகம் திருநீல
கண்டத்தினால் விளங்க வறிந்துய்யும்படி என்ற கருத்துமாம்.
|
தொண்டினில்....எய்தி - உறுதியாவது எஞ்ஞான்றும் பிறழ்வுறாமை;
மெய்யுணர்வு - துணிந்த முடிந்த உண்மை நினைவு; திருத்தொண்டே வீடுபேற்றுக்கு
வழியாவது என்ற உறைப்பு.
|
அலகில்....ஆக்கும் - “தொண்டரை ஆக்கி” என்ற வழிநூற் பகுதிக்குப்
பொருள் விரிக்குமாற்றால் சரிதவரலாற்றை வடித்து முடித்துக் காட்டியபடி.
அறிவளித்தல் - அவ்வத்தொண்டின் தொழில் அறிவும், அதுஞானநெறிக்கு வழியாகும்
திறத்தைஅறியும் அறிவும் தருதல்; திறம் ஆக்கும் திறத்தினை விளங்கி
ஓங்கச்செய்யும்.
|
குலவும் - விளக்கஞ் செய்கின்ற; விளங்குகின்ற; நீற்று வண்மை -
நீற்றிநெறியின் உறைப்பு. 7 |