| | பாறுற் றவெயிற் பதிபற் றறவிட்
டேறுற் றனனோ டியிருஞ் சுரமே. 29
|
(இ-ள்) மாறுற்ற...அதிகன் - பகைமை பூண்ட வலிய சேனைகளையுடையவாள்
ஏந்திய அதிகன் நூறுற்ற...பட - அழிந்துபட்ட பெரும்படைகள் குவியல் குவியல்களாக
ஆக்கப்பட்டதனால்; பாறுற்ற....சுரமே - சிதறுண்ட மதில்களைக் கொண்ட தனது
ஊரினைப் பற்றியிருத்தலை விட்டுப் பெரிய காட்டினுள்ளே ஓடிப்போய் ஒளித்தனன்.
|
(வி-ரை) மாறு - பகைமை; நூறுதல் - அழிதல்; நூழில் - கொன்று குவித்தல்;
இது பற்றிய துறை நூழிலாட்டு எனப்படும். பாறுதல் - சிதறுதல்; ஏறுறுதல் -
உட்சென்று ஒளித்தல் என்ற பொருள் தந்து நின்றது.
|
இருஞ்சுரம் - நெருங்கிய காடு; கானகம் பாலைவனம் என்பாருமுண்டு.
|
பற்றறவிட்டு - பதிபற்றுக்கோ டாகக் காவல் தரும் என்று எண்ணித்
துணிந்திருந்த ஒழுக்கத்தினை விடுத்து; “பற்றறுப்பீர்” (3958).
|
விறற்படை - சேனை; “அடற்படையும், உளநிறைவெஞ் சினந்திருகி” (3960);
அதிகன் படைச்செருக்கும் பதிச்செருக்கும் என்ற இரண்டினையுமே பற்றித் துணிவு
கொண்டு பணியாதிருந்தனன்; அவற்றுள் அந்தப் படை முன் பலபோரிலும்
வென்றிருந்தது; இப்போது நூறுண்டு நூழில்பட்டது; எயிற்பதி பாறுற்றது. ஆதலின்
பற்றற விட்டு ஓடினன் என்பதாம். நூழில்பட்டதனாலும், பாறுற்றதனாலும் என்க.
|
சுரமே ஓடி ஏறுற்றனன் - இவ் வதிகன் ஏழு அரசர்களைப் போரில்
வென்றிருந்து இறுதியில் சேரமான் பெருஞ் சேர லிரும்பொறையால் வெல்லப் பட்டான்
என்று பதிற்றுப்பத்து (8ம் பத்து) அறிவிக்கின்றது; இவ்வாறு பின்னரே வென்றொழிய
இருந்தானாதலின் இப்போது அருஞ்சுரமே ஓடி ஏறுற்றனன் என்பதாம்.
|
மாறு - நூறு - (நூழில்) - பாறு - என்ற இவ்வெதுகைத்தொடைகளும்
சொற்கருத்துக்களும் காட்டும் போர்பற்றியே, உமாபதி சிவனார் திருத்தொண்டர் புராண
வரலாற்றினுள் “மாறுமுகமும் பொருந்த” என்ற முருகப்பெருமான் துதியினுள்
எடுத்தாண்டு போற்றியிருத்தல் காண்க.
|
| 3971. | அதிகன் படைபோர் பொருதற் றதலைப்
பொதியின் குவையெண் ணிலபோ யினபின்
நிதியின் குவைமங் கையர்நீள் பரிமா
எதிருங் கரிபற் றினரெண் ணிலரே. 30
|
(இ-ள்) அதிகன்....போயினபின் - அதிகனது சேனையிலே செய்தலில்
வெட்டப்பட்ட போர் வீரர்களின் தலைக்குவியல்களின் கூட்டம் எண்ணில்லாதன
அனுப்பப்பட்ட பின்பு; நிதியின் குவை...எண்ணிலரே - நிதிக்குவியல்களும், பெண்களும்
நீண்ட குதிரைகளும் போரில் சீறி எதிர்க்கும் யானைகளுமாகிய இவற்றை அளவற்ற
சேனைவீரர்கள் கொண்டனர்.
|
(வி-ரை) போரில் வென்ற அரசனது வீரர்கள் வெல்லப்பட்ட அரசனது
படைவீரர்களின் வெட்டுண்டு வீழ்ந்த தலைக்குவியல்களைக் கொண்டு தமது அரசன்
முன் கொணர்ந்து காட்டுதல் முன்னாட் போர் முறைகளுள் ஒன்று; “பகைத்தவர்
சின்னமும் கொண்டு” (கோவையார் - 330). |