| வேறு
|
| 3975. | கண்டபொழு தேநடுங்கி மனங்கலங்கிக் கைதொழுது
கொண்டபெரும் பயத்தினுடன் குறித்தெதிர்சென் றதுகொணர்ந்த
திண்டிறலோன் கைத்தலையிற் சடைதெரியப் பார்த்தருளிப்
புண்டரிகத் திருக்கண்ணீர் பொழிந்திழியப் புரவலனார், 34
|
| 3976. | “முரசுடைத்திண் படைகொடுபோய் முதலமைச்சர் முனைமுருக்கி
யுரைசிறக்கும் புகழ்வென்றி யொன்றொழிய, வொன்றாமற்
றிரைசரித்த கடலுலகிற் றிருநீற்றி னெறிபுரந்தியான்
அரசளித்த படிசால வழகி!”தென வழிந்தயர்வார், 35
|
| 3977. | “தார்தாங்கிக் கடன்முடித்த சடைதாங்குந் திருமுடியார்
நீர்தாங்குஞ் சடைப்பெருமா னெறிதாங்கண் டவரானார்;
சீர்தாங்கு மிவர்வேணிச் சிரந்தாங்கி வரக்கண்டும்
பார்தாங்க விருந்தேனோ பழிதாங்கு வே!”னென்றார். 36
|
3975. (இ-ள்) கண்ட...தொழுது - கண்டபொழுதே உடல் நடுங்கி மனம் கலங்கிக்
கைகூப்பித்தொழுது; கொண்ட......எதிர்சென்று - தம்மை மேற்கொண்டெழுந்த
பெரும்பயத்தினுடனே அதுவே குறிப்பாக எதிரே சென்று; அது......பார்த்தருளி -
அதனைத் தம்பால் எடுத்துக் கொண்டுவந்த திண்மையுடைய வலிய வீரன்
கைக்கொண்ட அத்தலையில் சடையானது நன்கு விளங்கித் தெரியப்பார்த்தருளி;
புரவலனார் - அரசராகிய புகழ்ச்சோழர்; புண்டரிக....இழிய - தாமரை போன்ற தமது
திருக்கண்களினின்றும் கண்ணீர் பொழிந்து வழிய நின்று, 34
|
3976. (இ-ள்) முரசு....ஒன்றொழிய - போர்முரசங்களையுடைய வலியபடைகளைக்
கொண்டுபோய் எனது முதன்மை பெற்ற அமைச்சர்கள் போரில் பகைவனை அழித்துப்
பிறரால் எடுத்துப் பேசப்படும் புகழ் பூண்ட வெற்றி ஒன்றே பெற்றது தவிர; ஒன்றாமல்
- நன்மை பொருந்தாமல்; திரைசரித்த....என - அலைதவழும் கடல் சூழ்ந்த உலகத்தில்
திருநீற்று நெறியினை நான் பாதுகாத்து அரசுசெய்த படியானது மிகவும் அழகிதாயிற்று!
என்று கூறி; அழிந்து அயர்வார் - மனமழிந்து தளர்வாராகி; 35
|
3977. (இ-ள்) தார்தாங்கி.....முடியார் - போரில் உரியமாலையினை அணிந்து
தமது அரசனுக்குரிய கடமையைச் செய்து முடித்த சடைமுடியினையுடைய இவர்,
நீர்....ஆனார் - கங்கையைத் தரித்த சடையினையுடைய சிவபெருமானது
திருநெறியினிலே நின்றவரானார்; சீர்....பழிதாங்குவேன் என்றார் - சிறப்பினையுடைய
இவரது சடைத்தலையைத்தாங்கி வரப்பார்த்தும் இப்பூமியைத் தாங்க இருந்தேனோ?
பழியினையே தாங்குவேனானேன் என்றார். 36
|
இம்மூன்று பாட்டுக்களும் தொடர்ந்து ஒரு முடிபு கொண்டுரைக்க நின்றன.
|
குறிப்பு: தலைக்குவியலில் ஒரு தலையில் புன்சடை கண்டவுடனே நாயனார்பால்
நிகழ்ந்தமெய்ப்பாடுகளும் மன நிலையும் இம் மூன்று பாட்டுக்களானும் கூறப்பட்டன.
செருக்கும் வெற்றிப்புகழும் தமதுபேரரசினை நிலைபெறுத்திய மேனிலையும் விளங்கிய
மன நிலையில் மகிழ்ந்து நின்ற இந்நேரத்தில் சடைத்தலை கண்டமாத்திரத்தே அவை
|