கோலம் மேனி எங்கும் விளங்கும்படி யிருந்த நிலையினைக் கண்டு; அவற்கு...பொன்
இட்டு - அன்று அவருக்கு இரட்டிப்புப் பொன் கொடுத்து; அவனி...திறமே - உலகில்
விளக்கும் மகுடம் தரித்த நரசிங்க முனையரையரது திறத்தினையே; புகழும்படி
எம்பரமே? - புகழும் தன்மையானது எமது அளவில் அடங்குமோ? (அடங்காது);
திறமே - புகழும்படி என்று கூட்டுக. பூட்டுவிற் பொருள்கோள்; பரம் - பாரம்
என்பது பரம்என நின்றது; ஏ எதிர்மறை; பாரம் - வல்லமை - தகுதி; தவர் -
சிவனடியார்; தவமாவது அடியார் திருவேடம் தாங்குதலும் திருத்தொண்டுமாம்;
பொன்னிடுவோன் - ஆதிரை நாடோறும் அடியாரைப் பூசித்து நூறு பொன்தரும்
நியமமுடையோன் (3986); இடுதல் - தருதல்; இகழும்படி - கண்டோர் இகழும்படியாக;
மடவார்....நிகழும்படி - மடவார் புனைகோலமாவன நகக்குறி, நோய் முதலியன
என்பர். “நிகழ்காமக் குறிமலர்ந்த, ஊனநிகழ்மேனி” (3987) என்பது விரிநூல். மீக்கூர்ந்த
பொருந்தாக் காமத்தால் விளையும் கேடுகளின் ஊனங்களாகிய அடையாளங்கள்
என்பது குறிப்புப் போலும்; படி கண்டு - படியினைக் கண்டு; இரட்டிபொன் -
நியமமாகத்தரும் நூறு பொன்னினை இரட்டித்து இருநூறாக்கிய பொன்.
அவனிதிகழ்தலாவது உலகில் அடிமைப்பண்பின் உண்மைத்திறம் விளங்குதல். திறம் -
உயர்ந்த பண்பு; உறைப்பு. பேரும் அடிமைப் பண்பும் வரலாறும் வகைநூல்
வகுத்துரைத்தது. இவை விரிந்தபடி விரிநூலுட் கண்டு கொள்க.
 

     விரி: 3983. (இ-ள்) கோடாத......அரசளித்து - செங்கோல் நீதி பிறழாத நெறியில்
விளங்கும் குறுநிலமன்னர் மரபில் வந்து அரசு செய்து; மாடாக....மனங்கொள்வார் -
பெருஞ் செல்வமாகத் திருநீலகண்டருடைய திருநீற்றினையே மனத்திற் கொள்பவர்;
தேடாத...காவலனார் - தேடிப்பெற வேண்டாது இயல்பிலே பெருவளங்களிற் சிறந்த
திருமுனைப்பாடி நாட்டினை ஆளும் அரசர்; நரசிங்கமுனையரையர் -
நரசிங்கமுனையரைய ரென்னும் பெயருடையவர்.
 

    (வி-ரை) கோடாதநெறி - செங்கோல் நீதிநெறி பிறழாத நிலை.
 

     முடிமரபு - பேரரசாகிய முடிமன்னரின் கீழிருந்து அரசுபுரியும் குறுநிலமன்னர்
மரபு; முடிசூடுமுரிமையில்லாதோர்.