| | எவ்விடத்தும் விலைபோகா தொழியவுமிப் பணியொழியார்
அவ்வரிபுல் லினைமாட்டி யணிவிளக்கா யிடவெரிப்பார், 6
|
| 4061. | முன்புதிரு விளக்கெரிப்பார் முறையாமங் குறையாமல்
மென்புல்லு விளக்கெரிக்கப் போதாமை மெய்யான
அன்புபுரி வாரடுத்த விளக்குத்தந் திருமுடியை
என்புருக மடுத்தெரித்தா ரிருவினையின் றொடக்கெரித்தார். 7
|
4060. (இ-ள்) இவ்வகையால்....எரித்துவர - முன்கூறிய இவ்வாறு
திருந்துவதற்கேதுவாகிய விளக்கினை எரித்துவர; அங்கு....ஒழியார் - அவ்விடத்து
ஒருநாளில் உடல் வருந்தி அரிந்து எடுத்துக் கொண்டு வந்து விற்கும் புல்
எவ்விடத்திலும் விலைபோகாமல் ஒழியக்கண்டும் இந்த விளக்குத் திருப்பணியினைக்
கைவிடாதவராய்; அவ்வரி...எரிப்பார் - அரிந்த அந்தப் புல்லினையே தீமாட்டி அழகிய
விளக்காக எரிப்பாராய், 6
|
4061. (இ-ள்) முன்பு....போதாமை - இறைவரது திருமுன்பு விளக்கு எரிக்கும்
முறைப்படி உள்ளயாமம் என்னும் கால அளவிற் குறையாமல் விளக்கெரிப்பதற்கு
அந்தப் புல்லுப் போதாமையினாலே; மெய்யான அன்பு புரிவார் -
மெய்ம்மையன்பினாலே திருத்தொண்டு செய்வாராகிய நாயனார்;
அடுத்த....மடுத்தெரித்தார் - அடுத்த விளக்காகத் தமது திருமுடியினையே எலும்பும்
கரைந்துருகும்படித் தீ மூட்டி எரித்தனர்; இருவினையின் தொடக்கு எரித்தார் -
இருவினைகளாகிய பாசத்தொடக்கினை எரித்தாராயினர். 7
|
இந்த இரண்டு பாட்டுக்களும் தொடர்ந்து ஒரு முடிபு கொண்டன.
|
4060. (வி-ரை) இவ்வகையால் - முன்பாட்டிற் கூறியவாறு இந்தவகையால்;
முன்னர்ப் பொருட்சார்பின் துணையால் இல்லிடையுள்ளனமாறி விளக்கு எரித்த
செயலை ஆயசெயல் (4059) என்று சேய்மைச் சுட்டினாற் கூறிய ஆசிரியர், அதனினும்
அணித்தாகிய உடற்சார்பாகிய மெய்ம்முயற்சியாற் பொருள்கொண்டு செய்ததனை
இவ்வகையால் என அணிமைச் சுட்டினாற் கூறியது கவிநயமும்
மெய்ப்பொருணயமுமாம்; முன்கூறிய அதனில் வேறுபட்ட இந்த என்ற குறிப்புமாம்.
|
திருந்து - திருந்தும்; திருத்துதற் கேதுவாகிய எனப் பிறவினைப் பொருள்
கொள்க.
|
எவ்விடத்தும் - விலைக்குக் கொள்கின்ற எல்லாவிடத்திலும்; உம்மை
முற்றும்மை.
|
ஒழியவும் - உம்மை உயர்வு சிறப்பு.
|
ஒழியவும் இப்பணி ஒழியார் - பொருள் வரும் வழி எல்லா மொழிந்தாலும்
பணியினை விடாது செய்தல் அன்பின் உறைப்பினாலன்றி யாகாது. ஒழியார் -
ஒழியாராகி; முற்றெச்சம்.
|
மாட்டி - ஒழுங்குபடுத்தித் தீ மூட்டி; அணிவிளக்காயிட - அழகிய விளக்குப்
போலவே எரிய; ஆதல் - உவம உருபு.
|
4061. (வி-ரை) முன்பு - இறைவரது திருமுன்பு; விளக்கு எரிக்கும் முறை
யாமம் - இத்தனை யாமம் விளக்கெரிப்பேன் என்று நியமமாக மேற்கொண்ட
காலவளவாகிய யாமத்தின் எல்லைவரை; யாமம் - 3? நாழிகை கொண்ட கால அளவு.
|