| சரிதச்சுருக்கம்: காரி நாயனார் புராணம் ;- திருக்கடவூரில் அவதரித்தவர்
காரிநாயனார். அவர் வண் தமிழின் துறைகளின் பயன் தெரிந்து சொல்விளங்கிப்
பொருள் மறையத் தமது பெயராற் காரிக்கோவை என்ற நூலினை இயற்றித் தமிழ்
மூவேந்தர்களிடமும் சென்று நட்பினைப் பெற்றனர். அவர்கள் மகிழும்படி
உரைநயமாக்கினார்.
|
| அவர்கள் தந்த பெருநிதிக் குவைகளைக் கொண்டு சிவனுக்குப் பல கோயில்கள்
சமைத்தனர்; எல்லாருக்கும் மனமகிழும் இன்பமொழிப் பயனை இயம்பினர்;
சிவனடியார்களுக்குப் பெருஞ் செல்வங்களை மிக அளித்தனர்; இறைவரது திருக்கயிலை
மலையினை என்றும் மறவாதிருந்தனர்; தமது புகழ் எங்கும் பரவ விளங்கி இடையறாத
அன்பினாலே சிவனருள் பெற்று வடகயிலை மலையினைச் சேர்ந்தனர்.
|
கற்பனை: (1) இனிய தமிழ்த் துறைகளின் பயன் தெரிந்து சொல்விளங்கப்
பொருள் மறையக் கோவைபாடுதல் அரிய வண்டமிழ்த் திறமாம்.
|
(2) அரசரும் மதிக்கப் பயில்வது பெருங் கல்வி வளத்தாலாவது.
|
(3) அரசர்பாற் றம் கல்வித் திறத்தாற் பெற்ற செல்வங்களைச் சிவனுக்கும்
சிவனடியார்க்கும் ஆக்குவது பேரன்பின்றிறமாம்
|
(4) இன்பமொழி கூறுதல் யாவர்க்கும் மனமகிழ்ச்சி தருவதொன்று; இன்ப மொழிப்
பயனாவது சிவனைச் குறித்துக் கூறுதலேயாம்
|
(5) இறைவரது திருக்கயிலைமலையினை மறவாத கருத்துடையரா யிருத்தல்
செய்தற்கு அரியசெயல்; மனத்தினைக் கயிலையில் சேரவைத்ததுபோல உடம்பும்
அங்குச் சேர்தல் பேரன்பின்றிறத்தாலாவது. அயரா அன்பு சிவப்பேற்றைத் தருவது.
|
தலவிசேடம்: திருக்கடவூர் ;- III பக்கம். 417 பார்க்க.
|
| காரி நாயனார் புராணம் முற்றும் |