:: TVU ::

கடல் சூழ்ந்த சருக்கம்

412

4107.	அரியவத் திருத்தொண் டாற்று மரசனா ரளவில் காலம் மருவிய வுரிமை தாங்கி மாலயற் கரியார் மன்னும் திருவருட் சிறப்பி னாலே செய்யசே வடியி னீழற் பெருகிய வுரிமை யாகும் பேரரு ளெய்தி னாரே. 12
(இ-ள்) அரிய........அரசனார் - அருமையாகிய அந்தத் திருத்தொண்டினை ஆற்றிய அரசர்; அளவில் காலம்......தாங்கி - பொருந்திய அளவில்லாத நீண்ட காலம் தமது உரிமையாகிய அரசாட்சியினையும் திருத்தொண்டினையும் தாங்கியிருந்து; மாலயற்கு...எய்தினாரே - விட்டுணுவுக்கும் பிரமனுக்கும் அரியவராகிய இறைவரது நிலைபெற்ற திருவருட் சிறப்பினாலே செம்மை தரும் சிவந்த திருவடியி னீழலின்கண் பெருகிய உரிமையாகும் பெரிய திருவருள் நிறைவினுள் பொருந்தப் பெற்றனர்.
(வி-ரை) அரிய அத்திருத் தொண்டு - செயற்கரும் செயலாகிய அத் திருத்தொண்டு; சிவாபராதத்தினை மாற்றிய நிலையும், தமது உரிமைத் தனித் தேவி என்றும் பாராது உலகப்பற்றினை அற எறிந்த நிலையும், அப்பற்றினை எறிந்து பற்றற்றான் பற்றிய பற்றினைப் பற்றிய நிலையும் திருத்தொண்டு எனப்பட்டன.
உரிமை - உரிய அரசாட்சியும் திருத்தொண்டும்; இவை இவ்வுலகநிலை; பேல்வரும் உரிமையாகும் என்றது வீடுபேறாகிய சிவனுலக உரிமைநிலை; அந்நிலை, மற்றற வெறிந்த அன்பர்க்கே உரியது என்றவாறு. “அடிமல ரன்றி வேறொன் றறிவினிற் குறியா நீர்மை” என்று முன் (4096) உரைத்த இவரது தன்மை பார்க்க. செய்ய சேவடி - செய்ய - செம்மை தரும் பண்புடைய. சே - சிவந்த.
பேரருள் - அருள் நிறைவாகிய தன்மை; பேரருளினிறைவில் ஒடுங்குதலே வீடுபேறு எனப்படும். 12
பேரர செய்தினாரே - என்பதும் பாடம்.
4108.	வையக நிகழக் காதன் மாதேவி தனது செய்ய கையினைத் தடிந்த சிங்கர் கழலினை தொழுது போற்றி யெய்திய பெருமை யன்ப ரிடங்கழி யாரென் றேத்தும் மெய்யரு ளுடைய தொண்டர் செயலினை விளம்ப லுற்றாம் 13
(இ-ள்) வையக நிகழ - உலகத்தில் விளங்க; காதல்......போற்றி - தமது காதலுடைய பட்டத்தரசியினது கையினைத் தடிந்த சிங்கரது திருவடிகளைத் தொழுது துதித்து; (அத்துணையாலே); எய்திய......விளம்பலுற்றாம் - பொருந்திய பெருமையுடைய அன்பராகிய இடங்கழியார் என்று துதிக்கப்படுகின்ற மெய்யருளுடைய திருத்தொண்டர் செய்த திருத்தொண்டினைச் சொல்லப் புகுகின்றோம்.
(வி-ரை) இது கவிக்கூற்று; சரித முடிப்பும் வருஞ்சரிதத் தேற்றுவாயுமாம்.
வையக.....சிங்கர் - சரிதசாரம்; சிங்கர் - இந் நாயனாரது பெயர்; முன் பெருஞ் சிங்கனார் (4097) என்றது காண்க. கையினைத் தடிந்த -“கைதடிந்த” என்ற முதனூலாட்சி (தொகை).
எய்திய பெருமை - பெருமை இவரைத் தேடி வந்தடைந்தது என்பது குறிப்பு; இச் சரிதத்துள் ஓரன்பர் தாமே போந்து இவரது பண்டாரத்தின் நெல்லைக் களவு செய்தேயும் அடியார்க் கமுதளித்த செய்தியும், அதுவேயாறாக நிகழும் செயலும் குறிக்கக் கூறியது தெய்வக் கவிநயம்; “ஆக்க மதர்வினாய்ச் செல்லும்; (குறள்)” என்ற கருத்துக் காண்க.