சரிதச்சுருக்கம்: இடங்கழிநாயனார் புராணம் :- கோனாட்டில்
கொடும்பாளூரில் வேளிர் குலத்து அரசளித்துப் பொன்னம்பலது முகட்டினைக்
கொங்கிற் பொன்னால் அணிந்த ஆதித்தச் சோழரது குலமுதல்வராகிய இடங்கழியார்
என்னும் மன்னவர் சிவனடித் தொண்டினிற் சிறந்திருந்தனர். சிவனடியார்
வேண்டியவற்றைச் செய்வார்.
     அவ்வூரில் சிவனடியார்க்கமுதூட்டும் பணிபூண்ட ஒரு அடியவர் இருந்தார்.
அவருக்கு அடியார்க்கு அமுதூட்டுதற்குரிய பண்டங்கள் ஒரு எவ்வகையாலும்
பெறாமையால் பணிமுட்டும்படி நேர்ந்தது. அதன் பொருட்டு அவர் அரசனது காவல்
மிகுந்த நெற்கொட்டகாரத்தில் நள் இரவிற் சென்று நெல்முகந்தனர்; அவரை முரசெறி
காவலாளர் கண்டுபிடித்து அரசன்முன் கொண்டுவந்தனர்; அரசன் கேட்க, அவர்
அடியார்க் கமுதூட்டும் செயல் முட்டியதனால் இது செய்தேன் என்றனர். அரசர், மிக
இரங்கி அவரை விடுவித்து இவரன்றோ எனக்குப் பண்டாரம் என்று கூறி, எனது
செல்வமுழுதும் அடியார்களுடையதேயாம்; நெற்பண்டார மட்டுமேயன்றி
நிதிப்பண்டாரமானவெல்லாம் அடியார்கள் கொள்ளை முகந்து கொள்க என்று எங்கும்
பறைசாற்றுவித்து அவ்வாறே கொள்ளை யூட்டினர்.