அறம்பற்றிச் செயல் செய்தனராதலானும், “குற்றமறப் பின் கொடுப்போம்” (4138)
என்றதனால் சிவதிரவியங் கவரும் கருத்திலர் ஆதலானும், ஆணைமறுத்து உண்டதற்கு
உரியதண்டம் செய்யப்பட்டா ராதலானும் இவர்களும் முறையிற் கன்மானுவம் தீர்ந்த
பின் முத்தி பெற்றனர். புக்குப் - பின் அணைய என்க; “கலந்தணைவாய்” (37)
என்புழிப்போல; இங்கு, இவ்வாறன்றிப், பொன்னுலகின் மேலுலகம் என்றதற்கு
தேவருலகத்தின் மிக்கதாகிய சிவனுலகம் என்றும், கிளைஞர் பெற்றது உடலை விட்டுச்
சென்று சிவனுலகு புகும் விதேகமுத்தி என்றும், அவ்வாறன்றி நாயனார் பெற்றது
சதேக (உடலுடன் கூடிய) முத்தி என்றும் உரைப்பாருமுண்டு. சதேகமுத்தியாவது -
நம்பிகள், சேரமானார், கண்ணப்பர், ஆனாயர் முதலியோர் பெற்றது போல வருவது;
கிளை - கிளைஞர் - மரத்தின் கிளை போல்வார்; உவம வாகுபெயர்; அணைக
என்று - என்றது அணை கென்று என வந்தது தொகுத்தல் விகாரம். இவர்களைச்
சிவன் அடியாருடன் பகையாய் முத்திபெற்றவர்களுள் வைத்து வகுத்தனர்
திருத்தொண்டர் புராண வரலாறுடையார்; இயற்பகை நாயனாரது கிளைஞர்போல.
நாயனாரது சொல்லையும் திருவாணையையும் மறுத்துச் செயல் செய்து தம் உயிர்
காத்துக் கொண்ட செயலையே பகைத்து என்று கொண்டனர்.
|
இந்நிலை - இந்நின்ற நிலையே; தமது வளமெல்லாஞ் சிவன் திருவமுது
பெருக்குதற்காக்கியமையாற் பொருட் சார்பு நீங்கிய நிலையும், கிளைமுழுதுமற
வெறிந்தமையாலுடற்சார்பு உயிர்ச்சார்புக ணீங்கியமையும் பெறப்பட்டன; இவ்வாறு
சார்புகெட ஒழுகினமையால் மேல்வரும் வினைகணீங்கச் சாருநிலை பெற்றனரதலின்
இந்நிலையே நம்பால் அணைக - என்றருளினர்; இனி இவர் இவ்வுலகிற் றங்குதற்குக்
காரணமில்லை என்பதாம்.
|
ஆர் உயிர் ஆய் - சித்துப் பொருள்களாகிய உயிர்கள் தோறும்
நிறைந்தவனாகியும்; ஆர்தல் - நிறைதல்; கிளைமுதல் தடிந்த உம் வேற்றுமைத்
தொகை; முதல் - வினைமுதல், வேர்; தடிந்த - வெட்டி வீழ்த்திய; குறிப்புப் பொருள்;
“மாமுதல்தடிந்த” (முருகு); தொனி என்பர்; தாள் அடைந்து - தியானித்து;
அடைந்ததனால்; ஞானமூட்டிச் செந்நெறி நிற்பித்தலின் அத்தனாய் என்றும், ஊட்டி
வளர்த்தலின் அன்னையாய் என்றும், உயிர்க்குயிராதலின் ஆருயிராய் என்றும்
அழியாத மீளா நிலை தருதலின் அமிர்தாகி என்றும் கூறினார் என்பர். 11
|
| 4145. | அத்தனா யன்னையா யாருயிரா யமிர்தாகி
முத்தனா முதல்வன்றா ளடைந்துகிளை முதறடிந்த
கொத்தலர்தார்க் கோட்புலியா ரடிவணங்கிக் கூட்டத்திற்
பத்தராய்ப் பணிவார்தம் பரிசினையாம் பகருவாம். 12
|
(இ-ள்) அத்தனாய்.....முத்தனாம் - தந்தையும் தாயும் ஆருயிரும் அமிர்தம் ஆகி
முத்தனாகிய; முதல்வன்தாள்......வணங்கி - இறைவரது திருவடியினை
உட்கொண்டதனால் சுற்றத்தின் பந்தத்தினை வேரறத்தடிந்த கொத்தாகிய
அலர்களைக்கொண்ட மாலையினை அணிந்த கோட்புலி நாயனாரது திருவடியை
வணங்கி; கூட்டத்தில்.....பகருவாம் - கூட்டத்தவர்களாகிய அடியார்களுள்ளே பத்தராய்ப்
பணிவார் களதுதன்மையினைச் சொல்வோம்.
|
(வி-ரை) அத்தனாய்....முத்தனாம் முதல்வன் - ஆய் - ஆக்கச் சொற்கள்
அதுவாந்தன்மை கொண்டிருத்தற் குறிப்புத்தருவன. எண்ணும்மைகள் விரித்
|