(இ-ள்) சங்கரனுக்கு.....பயன்றுய்ப்பார் - சிவபெருமானுக்கே ஆளாகிய தவத்தினை
மேற்கொண்டு உலகு விளக்கித் தாம் அதனால் குற்றமறப் பயன் பெறுவர்; படிவிளக்கும்
பெருமையினார் - உலகினை விளங்கச் செய்யும் பெருமையினை உடையவர்கள்;
அங்கணனை...போற்றுவார் - அங்கணராகிய சிவபெருமானைத் திருவாரூரினை ஆளும்
இறைவரைத் திருவடிகளில் வணங்கி மேன்மேல் எழுகின்ற சித்தத்துடனே பத்தராய்ப்
போற்றுபவர்கள்.
|
(வி-ரை) துய்ப்பாரும் பெருமையினாரு மாவார்கள் பத்தராய்ப் பணிவார்கள்
என்று இயைக்க; பெயர்ப்பயனிலை.
|
தவம்காட்டி - தவம் - சிவவேடமும் சிவபூசையும்; காட்டுதல் -
இவையுடைமையினால் உள்ளே நிகழும் அன்பினை அறியச் செய்தல்.
|
தாம் - தாமும் என எச்ச உம்மை விரிக்க; உலகறியவைத்த
பயன்றருதலேயன்றித் தாமும் அத்தவத்தால் வரும்பயனை அனுபவிப்பர். உலகறியத்
தவவேடம் பூணலேயன்றிக் தாம் அதன் பயன் துய்யாதாரும் உளராதலின்
அவரினின்றும் வேறுபிரித்துணரத் தாமும் அதனாற் பயன்றுய்ப்பார் என்றார்;
முத்தநாதன், அதிசூரன் முதலாகவந்த தருதவவேடத்தாரையும். வயிற்றுப்பிழைப்புக்காகத்
தாங்கும் தவவேடத்தாரையும் நீக்குதலின் பிறிதினியைபு நீக்கிய விசேடணம்; பங்கமற -
என்ற குறிப்புமது. பயன் - சாதனமுறையாலே தவத்தால் வரும் பயன்.
|
படி - உலகு; உலகருக்கு; இடவாகு பெயர்; படிவிளக்கும் - உலகை விளங்கச்
செய்யும்; விளக்குதல் - எடுத்துக்காட்டாக நிற்றலால் அறிவுறுத்துதல்; நடந்து (ஒழுகிக்)
காட்டுதல்; படி - இதன்படி என்ற மேற்கோள்நிலை (Example - உதாரணம்)
என்றுரைக்கவும் நின்றது; பத்தர் குணங்கள் எட்டின் நிலை.
|
அங்கணனைத் திருவாரூ ராள்வானை - “அரசினையாரூ ரமரர் பிரானை
அடிபணிந்திட்டு” (திருவந் - 70) என்ற வகைநூற் கருத்தினை விரித்தவாறு.
|
படிவிளக்கும் பெருமையினார் “உரை செய்த....அங்கத்தினோர்” (திருவந். 70)
என்ற வகைநூற்கருத்தினைக் காட்டியவாறு.
பொங்கி எழும் சித்தம் - மேன்மேல் அன்புபொங்கி எழும் உறைப்பாகிய
சித்தம்.
|
பயன்றுய்யார் என்ற பாடம் தவறு. 8
|
பத்தராய்ப்பணிவார் புராணம் :- பண்பு - அடியார்களைக் கண்டாற்
பசுவின்பின் கன்று போல அணைகுவர்; சிவபூசை செய்வோரைக் கண்டால் உவந்து
பயன்பெறுகுவர்; அடியார்களையும் அரனையும் வழிபடுவர்; தாம் செய்யும்
எத்தொழிலும் சிவனுக்காவன வென்றே செய்குவர்; சிவனடியார் கதையினைவிரும்பிக்
கேட்பர்; எப்போதும் சிவனை மறவார்; உலகு விளங்கத் தவம் காட்டிப் பயன்பெறுவர்;
பதிதராய் பணியும் படியினை உலகில் விளக்கம் செய்குவர்; அவரே சித்தம் பொங்கிய
எழுச்சியுடன் பத்தராய்ப் பணிவார்கள்.
|
கற்பனை :- (1) ஆசையொடும் அரனை வழிபடுதலும் அடியாரை அடைந்து
வழிபடுதலும் பத்திச்செயல்கள்.
|
(2) உடம்பாற் செய்வினைகள் யாவும் சிவன்பாலே யாகுக என்ற சித்தத்துடன்
எல்லாத் தொழில்களும் செய்தல் வீடுபேற்றுக்குரிய சிறந்த சாதனம்.
|
(3) சிவனடியார் சரிதங்களை விரும்பிக்கேட்பது பத்தியின் தன்மைகளுட் சிறந்தது
|
(4) எந்த அவத்தையினின்றாலும் சிவனை மறத்தலாகாது.
|
(5) தவத்தை தாம் மேற்கொண்டு காட்டித் தாமும் பயன்றுய்த்தலும் அதனால்
உலகை விளக்குதலும் பத்தரின் பண்பு.
|
| 58. பத்தராய்ப்பணிவார் புராணம் முற்றும் |