(7) நிதியில்லவர் சிவன் கோயில் அமைக்க முயன்றால் உலகம் அவரை
ஆதரித்து நிதி தராது.
|
(8) புறத்திலே கோயில் அமைக்க நிதியின்மையா லியலாமற் போயினும்,
அகத்திலே மனத்தினால் நிதியையும் சாதனத்தையும் தச்சரையும் தேடிக் கோயில்
அமைத்தால் அப்புண்ணியத்தினு மிக்க பேறு பெறலாம். இது யாவரும் செய்யத் தக்கது;
புறக்கோயிலமைத்தலினும் இது சிறந்ததுமாம்.
|
(9) புறத்தே அமைக்கும் கோயிலினும் அகத்தே அமைக்கும் கோயிலினில்
இறைவர் மிக விரும்பி எழுந்தருளுவர்.
|
(10) மனக்கோயிலின் பெருமை இறைவரே உலகறியச் செய்யும் சிறப்புடையது.
|
தலவிசேடம் - திருநின்றவூர் :- இது தொண்டை நாட்டில் உள்ளதோர் பதி;
தேவாரப் பாடல் பெறாவிடினும் பூசலார் நாயனார் அவதரித்து மனக்கோயில்
அமைத்துப் பணி செய்து அதில் இறைவரைத்தாபித்துப் பல நாள் பூசித்து
இறையடியடைந்த சிறப்புடைய பதி; திருத்தொண்டத் தொகையுட் பேசப்படுதலால்
தேவார வைப்புத் தலமுமாம். இப்போது தின்னனூர் என்று மருவி வழங்கப்படுகின்றது.
இங்குச் சிவாலயம் உண்டு. அதில் பூசலார் நாயனாரது திருவுருவம் தாபித்து வழிபடப்
பெறுகின்றது. கோயில் நன்கு கவனிக்கப்படுகின்றது. சுவாமி - மனக்கோயில் கொண்ட
நாதர்; அம்மை - உமையம்மை.
|
இது தின்னனூர் என்ற நிலையத்தினின்றும் தெற்கே கற்சாலை வழி ஒரு
நாழிகையளவில் அடையத்தக்கது. (தின்னனூர் நிலையத்தினின்றும் நேர் வடக்குக்
கற்சாலை வழி 12 நாழிகை சென்றால் ஆரணியையடைந்து, அங்கு நின்றும் 6
நாழிகையளவில் திருக்கள்ளில் என்ற தொண்டை நாட்டுப் பாடல் பெற்ற தலத்தை
அடையலாம்.)
|
கச்சிக்கற்றளி - (4179) காஞ்சிபுரத்தில் உள்ள கைலாச நாதல் கோயில் என்பர்.
இது மிகச் சிறந்த சிற்ப ஓவிய வேலைப்பாடுகளமைந்தது. திருக்கயிலாய மலையின்
இயற்கையமைப்பினைப் போலவே சிகரங்களுடன் காணக் கோயில் அமைக்கப்பட்ட
தென்பர். நாட்டுச் சரித்திர சம்பந்தமான சிறப்புக்கள் பலவுடையது.
|
| 65. பூசலார் நாயனார் புராணம் முற்றும். |