(வி-ரை) பாலை....ஆராய்ந்து - பாடல், கண்டப்பாடல் என்றும் கருவிப்பாடல்
என்றும் இருவகைப்படும். இவற்றுள் கண்டப்பாடல் உயிர்க்கிடனாம் கருவியாகிய
உடற்பகுதிகளால், இயற்றப்படுதலாற் சிறப்புடையது. கருவிப்பாடல், உயிரற்ற
கருவிகளாலியற்றப் படுதலின் அத்துணைச் சிறப்பில; அவை எந்த அளவுக்கு
மிடற்றுப்பாடலுடன் ஒப்பிடவருமோ அந்த அளவுக்குச் சிறப்புடையன; அவ்வொற்றுமை
பற்றித் தலைசிறந்த கருவிகள் குழலும் யாழுமாம்; இவ்விரண்டனுள்ளும் சொல்லையே
ஒலிப்பதுபோன்ற தன்மையாற், குழல், மிகச் சிறந்தமையால் முன்வைக்கப்படும்
இம்மூன்றனுள் கண்டப்பாடற் பாகுபாட்டமைதியினை முன்னர்த் தடுத்தாட்கொண்ட
புராணத்துள்ளும் (221), குழற்கருவியின் அமைதியினை ஆனாய நாயனார்
புராணத்துள்ளும் (938; 947 - 953) விரித்தருளினர். ஆண்டாண்டும், பிறாண்டும் (III -
பக். 1223) உரைத்தவை யெல்லாம் இங்கு வைத்துக் கண்டுகொள்க. குழற்கருவிக்
குரைத்த தன்மைகள் எல்லாம் பெரும்பாலும் யாழ்க்கருவிக்கும் ஒக்கும். அவற்றுள்
யாழ்ப் பண் அமைதிபற்றிச் சிறப்பாயறியப்படும் ஒருசில பண்புகளை மட்டும் ஈண்டச்
சுருக்கி ஆசிரியர் எடுத்துக் கூறியருளுகின்றார்; அத்தன்மைகளுள் கருவி வீக்குதலும்
கை பலமுறையு மாராய்தலும் குழலுக்கின்றி, யாழுக்குச் சிறப்பாயுரியனவாதலின் ஈண்டு
எடுத்துக் கூறப்படுதல் கண்டு கொள்க.