53. இலம்பையங்கோட்டூர்

தொண்டைநாட்டுத்தலம். கூவத்துக்குத் தென்மேற்கே 2 கி.மீ. தூரத்திலுள்ளது. சென்னை, காஞ்சிபுரம், அரக்கோணம் ஆகிய ஊர்களிலிருந்து பேருந்துகள் செல்கின்றன.

இங்கு அரம்பையாதியர் பூசித்துப் பேறுபெற்றனர். அரம்பையங்கோட்டூர் என்பது இலம்பையங்கோட்டூர் என மருவியது. இறைவன் சந்திரசேகரர். இறைவி கோடேந்து முலையம்மை. தீர்த்தம் சந்திர தீர்த்தம். இத்தலம் திருவிற்கோலத்தினின்றும் தென்மேற்கே 5 கி.மீ. தூரத்தில் உள்ளது.

கல்வெட்டு:

பாண்டியன் கோநேரின்மை கொண்டான் திரிபுவனச் சக்ரவர்த்தி ஜடாவர்மன் சுந்தரபாண்டியன் ஆட்சியில் மணவிற் கோட்டத்தின் பகுதியான கான்றூர் நாட்டிலுள்ள இலம்பையங்கோட்டூர் என வழங்கப்பெறும்¹, திரிபுவனச் சக்கரவர்த்தி திரிபுவன வீரதேவனது ஆட்சியில் கான்றூர் நாட்டிலுள்ள சதுர்வேதிமங்கலம் இலம்பையங்கோட்டூர் எனவும் வழங்கப் பெறும்². இறைவன் பெயர் இலம்பையங்கோட்டூர் உடையநாயனார் என்பது³.

இராஜாதிராஜதேவன் காலத்தில், தேவநாயகசுவாமிகோயில், சிவபாதசேகர மூவேந்தவேளானால் கட்டப்பட்டுள்ளது⁴. ஏனையவை விளக்கிற்கு நெல், பொன், ஆடுகள், நிலங்கள் முதலியன தானங்கொடுக்கப்பட்டதை அறிவிக்கின்றன.

54. திருவிடைச்சுரம்

தொண்டை நாட்டுத்தலம். மக்கள் வழக்கில் திருவடிசூலம் என வழங்கப்படுகிறது. செங்கற்பட்டிலிருந்து திருப்போரூர் செல்லும் பேருந்தில் திருவடிசூலம் செல்லலாம். பேருந்து நிறுத்தத்திலிருந்து 1 கி.மீ. தூரத்தில் ஆலயம் உள்ளது.

இத்தலம் மலைகளின் இடையில் கற்சுரத்தில் அமைந்தமையின் இப்பெயர் எய்தியது. சனற்குமாரமுனிவர் பூசித்துப் பேறுபெற்ற தலம்.

___________________________

¹ 232 of 1910, ² 234 of 1910, ³ 234 of 1910, ⁴ 231 of 1910.