பதிக வரலாறு;

வெங்குருவேந்தனார் திருவீழிமிழலையிலிருந்து பாடியருளியவற்றுள் ஒன்று
இத் திருப்பதிகம்.

திருமுக்கால்
பண்: சாதாரி

 திருச்சிற்றம்பலம்

     பொ-ரை: விண்ணிலுள்ள வெண்ணிறச் சந்திரனைத் தொடுமளவு
உயர்ந்துள்ள மதில்களையுடைய திருவீழிமிழலை என்னும் திருத்தலத்தில்
விரும்பி வீற்றிருந்தருளுகின்றவரும், சடையில் ஒளி பொருந்திய சந்திரனை
அணிந்துள்ளவருமான சிவபெருமானே! ஒளி பொருந்திய சந்திரனை
அணிந்துள்ள உம்மை முதற்பொருளாக உணர்ந்து வழிபடுபவர்கள்
சிவஞானம் பெறுவர்.

     கு-ரை: வெணி மதி - வானில் ஊரும் மதி. சடை மதி - சடையில்
தங்கும் மதி. மதிள் - மதில். ளகரலகர ஒற்றுமை: போலி என்னலாகாது;
சாம்பர் என்பதில் ஈற்றெழுத்து உரியதன்று; லகரனே உரியது ஆகலின்
ரகரம் போலி. ஒற்றுமை அங்ஙனமன்றி மஞ்சள், மஞ்சல், மங்களம் மங்கலம்
என ஈரெழுத்தும் உரியவாய் வருவது. மதியைச் சடையில் அணியாக
உடையார். அணி - ஆபரணம். கண் - (உமது திருவடிப் பேற்றையே
குறிக்கோளாகக்) கருதும். மதி - புத்தி. மிகுவது - அதிகரிப்பதும். அவர்க்கு
இயல்பாய் எய்திடக் கூடிய தன்மையாம். கண்மதி - வினைத்தொகை.
கண்ணுதல் இப்பொருளாதலை “விண்ணினார்கள் விரும்பப்படுபவன்,
கண்ணினார் கடம்பூர்க்கரக்கோயிலே” என்னுந் திருக்குறுந்தொகையால்
அறிக. உணர்பவர் - உம்மையே பதிப்பொருளாக உணர்பவர். கடன் -
இயல்பு “மாலறியாக் கடனாம் உருவத்தரன்” என்ற திருக்கோவையாரால்
அறிக.