திருச்சிற்றம்பலம்

10. பொ-ரை: அருவிகள் பாய்கின்ற இறைவனது திருமலையில் எதிரொலி உண்டாக, அதன் அருகில் தனது ஊர்தியைச் செலுத்திய இராவணனது தலையை நெரித்தவனும், திருச்சுழியலைத் தனது பெரிய ஊராகக் கொண்டு எழுந்தருளியிருப்பவனும் ஆகிய இறைவனது திருவடிப் பெயரைப் புனைந்தவனும், திருநாவலூரார்க்குத் தலைவனும் ஆகிய நம்பியாரூரனது இத் தமிழ்ப் பாடல்கள் பத்தினையும் உணர்கின்றவர், துன்பம் யாதும் இலராவர்.

கு-ரை: "நிமலன் மலை" என்றார், மலமுடைய அவன் அணுகலாகாமையை நினையாமை பற்றி. "அயல் அருகு" ஒரு பொருட் பன்மொழி. இறைவனது பெயரை அவனது திருவடிப் பெயராக அருளினார், தம் பணிவு தோன்ற. "அடி" என்றதன்பின், பகர ஒற்று மிகாமைப் பாடம் ஓதுவாரும் உளர்.