கு-ரை: இத்திருப்பாடலின் முதலடியை,

"ஊனார் உடைதலையில் உண்பலிதேர் அம்பலவன்"

(தி. 8 திருக்கோத் - 2)

என்னும் திருவாசக அடியோடு வைத்துக் காண்க. "ஆன்" என்றது, ஆனினது பொதுத்தன்மையை. பதிதல் - ஆழ்தல்.

7. பொ-ரை: கச்சு மேற்பொருந்தப்பெற்ற தனங்கைளயுடைய மகளிர் அழகுடன் நிறைந்து நிற்கும் தெருக்களில் தேர்கள் ஓடுகின்ற திருநறையூரில் உள்ள, 'சித்தீச்சரம்' என்னும் திருக்கோயிலே, கருமை நிறம் பொருந்திய கடலில் தோன்றிய நஞ்சினை உண்டு, தேவர்கட்கு அருள்செய்த, நீர்ததும்பும் சடையினையுடையவனாகிய இறைவன் விளங்கியிருக்கின்ற இடமாகும்.

கு-ரை: 'இளமையையுடைய மகளிரும், மைந்தரும் செல்வச் சிறப்போடு வாழும் ஊர், திருநறையூர்' என்று அருளியபடியாம்.

8. பொ-ரை: தமது கடமைகளை விரும்பிச் செய்யும் அந்தணர்கள், நிறைந்த சொற்களின் பொருளை ஆராய்கின்ற திருநறையூரில் உள்ள, 'சித்தீச்சரம்' என்னும் திருக்கோயிலே, யானைத் தோலையும், ஆண் மான்கன்றையும், எரிகின்ற மழுவையும் உடையவனாகிய இறைவனது இடமாகும்.