7. பொ-ரை: பாசப் பிணிப்பால் உண்டாகும் திரிபுணர்வை நீக்கியவர், கைகுவித்துக் கும்பிட்டுத் துதிப்பதும், இடபவாகனத்தை யுடையவனும், அட்டமா நாகங்களையும் அணிந்தவனுமாகிய இறைவனுக்கு உரித்தாயதுமான இடம், பகலவனது ஒளியினின்று நீங்கியதும், குயிற் பேடை தனது சேவலோடு கூடி விளையாடுவதும் ஆகிய சோலைக் கண் ஒப்பற்ற மாதவியில் தேன் ததும்பி மலர்ந்த மலர், மணத்தைப் பொருந்துகின்ற, ஆரவாரத்தையுடைய கச்சிமா நகர்க்கண்ணுள்ள, ‘திருவனேகதங்காவதம்’ என்னும் திருக்கோயிலே.

கு-ரை: "ஒளியால்", "மாதவியோடு" என்றன உருபு மயக்கம். ‘விட்டுமிடம்’ என்பது பாடமாயின், டகரமெய் விரித்தல் என்க.

8. பொ-ரை: ‘முன்பே அடையப் பட்டவனைக் கடைபோகத் தொழுது உய்வோம்’ என்று நினையாது, புத்தனது பொய்யுரையால் மயங்கிய அசுரரது அரண்கள் மூன்றினையும் சாம்பலாக்கிய வில்லை யுடையவனும், யாவரிடத்தும் கண்ணோடாது உயிரை வௌவும்