7. பொ-ரை: சிவபெருமானாருக்கு உரிய தலங்கள், ஈழநாட்டில் உள்ள மாதோட்டம், தென்னாட்டில் உள்ள இராமேச்சுரம், சோழநாட்டிலுள்ள துருத்தி, நெய்த்தானம், திருமலை, கடல் சூழ்ந்த நிலவுலகிற் கெல்லாம் அணியாய் விளங்கும் கீழையில், கிள்ளிகுடி என்பவை.

கு-ரை: மாதோட்டமாவது, அந்நகரின்கண்ணுள்ள, கேதீச்சரம். திருமலை, கீழையில், கிள்ளிகுடி இவை வைப்புத்தலங்கள்.

8. பொ-ரை: ‘நன்னிலம், பனையூர், கஞ்சனூர், நெல்லிக்கா, நெடுங்களம், கடைமுடி, கண்டியூர், வேளா நாட்டில் உள்ள வேளூர், விளத்தூர் நாட்டிலுள்ள விளத்தூர்’ என்பவைகளில், மிக நீண்ட சடையையுடையவனும், நஞ்சணிந்த கண்டத்தை யுடையவனுமாகிய இறைவன் எந்நாளும் எழுந்தருளியிருப்பன்.

கு-ரை: ‘நெல்லிக்கா’ என்பது, ஈற்றில் உகரம் பெற்றது. வேளூரும், விளத்தூரும் வைப்புத் தலங்கள். ‘வேளார் நாட்டு’ எனவும் பாடம் ஓதுவர். ‘தென்பனையூர், வடகஞ்சனூர்’ என்றது, அவை தம்முள் நோக்கி.