திருச்சிற்றம்பலம்

விளைவுகளை வஞ்சியாதளிக்கின்ற வயல்களையுடைய திருநாவலூரில் உள்ளார்க்குத் தலைவனும், வனப்பகைக்குத் தந்தையும் ஆகிய வன்றொண்டன் விரும்பிப் பாடிய செவ்விய சொற்களாலாகிய இத்தமிழ்மாலைகள் பத்தினையும் பாட வல்லவர் சிவலோகத்தில் வீற்றிருத்தல் திண்ணம்.

கு-ரை: தான், அசைநிலை. மிகக் கொடுப்பவரை, 'வஞ்சியாது கொடுப்பவர்' என்னும் வழக்குப் பற்றி, ''வஞ்சியாது அளிக்கும் வயல்'' என்று அருளினார். இனி, 'வஞ்சியாது அளிக்கும் நாவலூரர்' என, நாவலூரில் உள்ளார்க்கு அடையாக்கலுமாம். நாவலூரை, 'நாவல்' என்றல், பான்மை வழக்கு. 'என்று வன்றொண்டன் விரும்பிச் சொன்ன' என இயையும். ''வன்ன்றொண்டன்'' என ஒற்றளபெடை வந்தது. அளபெடையின்றி ஓதுதல் கூடாமையறிக.