தந்ததுன் றன்னைக் கொண்டதென் றன்னைச்
சங்கரா ஆர்கொலோ சதுரர்
அந்தமொன் றில்லா ஆனந்தம் பெற்றேன்
யாதுநீ பெற்றதொன் றென்பால்
சிந்தையே கோயில் கொண்டஎம் பெருமான்
திருப்பெருந் துறையுறை சிவனே
எந்தையோ ஈசா உடலிடங் கொண்டாய்
யான்இதற் கிலன்ஓர்கைம் மாறே.

பதப்பொருள் : சிந்தையே - எனது சித்தத்தையே, கோயில் கொண்ட - திருக்கோயிலாகக் கொண்டு எழுந்தருளிய, எம் பெருமான் - எமது தலைவனே, திருப்பெருந்துறையுறை சிவனே - திருப்பெருந்துறையில் வீற்றிருக்கும் சிவபெருமானே, எந்தையே - எம் தந்தையே, ஈசா - ஈசனே, உடலிடம் கொண்டாய் - எனது உடலை இடமாகக் கொண்டவனே, சங்கரா - சங்கரனே, தந்தது - எனக்கு நீ கொடுத்தது, உன் தன்னை - உன்னை, கொண்டது - அதற்கு ஈடாக நீ என்னிடம் ஏற்றுக்கொண்டது, என்றன்னை - என்னை, அந்தம் ஒன்று இல்லா ஆனந்தம் பெற்றேன் - (உன்னை நீ எனக்குத் தந்ததால்) யான் முடிவு சிறிதுமில்லாத பேரின்பத்தை அடைந்தேன், நீ என்பால் பெற்றது ஒன்று யாது - நீ என்னிடத்தினின்றும் அடைந்த பயன் என்ன? ஒன்றும் இல்லை. ஆகவே, சதுரர் ஆர் - இக்கொள்ளல் கொடுத்தல்களைச் செய்த நம் இருவருள் திறமையுடையவர் யார்? (நானே திறமையுடையவன்); இதற்கு - இவ்வுதவிக்கு, யான் ஓர் கைம்மாறு இலன் - நான் ஒரு பிரதியுபகாரமும் செய்ய முடியாதவனாயினேன்.

விளக்கம் : உடல் இடம் கொள்ளுதலாவது, உள்ளம் வழியாக உடலிலும் வியாபித்திருத்தல். சித்தமிசை குடி கொண்ட அறிவுப் பொருள் உடல் முழுவதும் ஆனந்தத்தை நல்கிக்கொண்டிருக்கிறது என்க. பெருமான் தன்னைத் தந்து என்னைக் கொண்டது ஊதியமில்லா வாணிகமாயிற்று என்பதாம். இது நிந்தாஸ்துதி. கொல், ஓ - அசைகள்.

இதனால், இறைவனது கைம்மாறு கருதாத கருணை கூறப்பட்டது.

10

திருச்சிற்றம்பலம்